KHAWTHLIR

Mizoram University leh Central Public Works Department (CPWD) chuan MZU tihchangtlunna turah nimin khan thawhhona tur thuthlung, Memorandum of Understanding (MoU) an ziak. MoU hi MZU tihchangtlunna tura Higher Education Financing Agency (HEFA)-in Ministry of Education remtihnaa cheng vbc. 180 a pek tur atan a ni a; MZU leh PUC-ah in chi hrang 14 sak a ni ang. MoU-ah hian MZU aiawhin registrar Prof. Lalnundanga’n hming a ziak a, CPWD aiawhin executive engineer (Aizawl Central Division) Lohit Sonowal-in hming a ziak a ni.

State Election Commission chuan nimin khan notification ti chhuakin, Lai Autonomous District Council (LADC) inthlan hun atan December 4, 2020 ruat a nih thu a tarlang. Inthlan chuh tumte tan November 20 thleng hming pek luh theih a ni a, December 4 zing dar 7 aṭanga tlai dar 4 thleng vote thlak tur niin, chumi hnuah vote tlate chhiar zui a ni ang.

Mizoram BAR Asso­ciation chuan Lailapur-a lirthei dan mekin Mizoramah harsatna a thlen avangin, lirthei dan tihtawp a nih theihna atan nimin khan Gauhati High Court, Aizawl Bench-ah PIL an thehlut.

Aizawl DC chuan, Aizawla Dinthar veng pumpui leh Salem Venga hmun ṭhenkhat chu containment zone-ah nimin khan a puang. Salem Venga containment zone-te chu - Vanapa Section huam chhung, Darrothanga in bul aṭanga Lungli Tuikhur, Republic Veng panna kawng chhak leh kawng thlang lama Salem Veng mi leh sa awmna chin zawng a ni.

State Referral Hospital-ah nimin khan Covid-19 vei mi pathum dah luh an ni a, anni nen SRH-ah mi 57 enkawl mek an ni. Mi 57 zinga paruk chu ICU-ah enkawl an ni a, mi dang zawng Isolation ward-ah an awm. ICU-a awm zinga pathum chu ventilator nen enkawl an ni a, pathum dang pawh oxygen pek mek an ni. Mi 57 zingah hian kum 60 chung lam mi 23 leh kum 14 hnuai lam mi pahnih an tel a ni.