Vawiinah Virtual Anthurium Festival

Mizoram sorkar chuan vawiin leh naktuk hian Virtual Anthurium Festival 2020 a buatsaih dawn. Sorkar thuchhuah tarlan danin, Festival hi boruak rip tak kara mipui rilru chhâwk zângkhai nana tih a ni a; a ni khatnaah chief minister  Zoramthanga khuallian a ni ang a, Tourism minister Robert Romawia Royte khualzahawm a ni ang.

Covid-19 avanga zin veivah leh mipui punkhawm a rem loh avangin media hrang hrang - LPS, ZONET, DDK-te leh social media Youtube, Facebook leh Instagram kaltlangin Virtual Anthurium Festival hi livestream-a pek chhuah tum a ni.

Tourism department chuan, Covid-19 chungchanga sorkarin kaihhruaina (SOP) a chhuah bawhchhe loin Virtual Anthurium Festival buatsaih tum a ni a, Mizo zaithiamte leh band-te bakah, traditional costume show leh hnam làmte entir a nih dawn thu, sorkar thuchhuah chuan a tarlang.