Minister of state Lalruatkima lakah Congress ṭhalaiin FIR an thehlut
Mizoram Pradesh Youth Congress Committee (MPYCC) chuan nimin khan minister of state Lalruatkima lakah Cyber Crime Police Station, Aizawlah an general secretary Ngurdingpuia Pachuau hmingin first information report (FIR) an thehlut.
FIR an thehluhah hian MPYCC chuan, November 6, 2020-a Facebook-a Save Mizoram tih group-ah thu dik lo thehdarh a nih vang a nih thu an tarlang a, "Pu Lalruatkima, Hon’ble Minister hian India Constitution hnuaia a thutiam a bawhchhia a, Constitution-a inziak, Mizoramin a huam chin tihdanglam, hre reng chunga mipui bum tuma a thehdarh hi dan bawhchhiatna nasa tak, Constitution zah lohna nia ka hriat avangin, a ṭul anga hma min laksak turin ka ngen che a ni," a ti.
MPYCC-in FIR-a an ziah danin, FB account pakhat, 'Rka Ruatkima' tih, minister Lalruatkima account nia hriat chuan MNF leh India sorkar inremna Memorandum of Settlement chungchang Wikipedia-a tarlan, 'The territory of Mizoram should be specified according to the North Eastern Areas (Reorganization) Act, 1971' tia inziak ṭhin chu, 'The territory of Mizoram should be specified according to the Bengal Eastern Frontier Regulation Act,1875' tia thlak danglam thlalak a post a ni.
Congress ṭhalaite chuan, "Hetiang taka document pawimawh, India Constitution-ah pawh ziah lan thlap hi Wikipedia-ah a thu thlaka dik lo taka edit a ni a, mipui bum nana hman tumin nasa takin social media (Facebook Save Mizoram Group)-ah a thehdarh a ni," an ti.