Anthurium Festival titàwp turin ngen

ZPM ṭhalaite chuan thuchhuah siamin, Anthurium Festival chu hripui léng kara nawmchen tumna a ni tih an tarlang a, Festival buatsaih tura ruahmanna kal mek chu titàwp turin Mizoram sorkar an ngen.

ZPM Ṭhalai chuan, "Covid-19 avanga khawvel a buai laia MNF sorkarin Anthurium Festival a huaihawt hi nuamtàwl sorkar hmalakna a ni a, kan thláwp ngai dawn lo," an ti a; kût hmang tura ruahmanna kal mek chu titawp turin sorkar an ngen a ni.

Hripui léng vanga inkhàrkhip avang leh nunphung a pangngaia kalpui theih a nih loh avangin mipui tam zawk, ei chawp zawngte dinhmun a harsa a, chhungkaw tam tak chu an ṭám mek tih sawiin ZPM Ṭhalai chuan, "Kan ṭhenawmte an ṭàm mek laia kûtpui lo ur hi a Zo zia lo a, 'Sem sem dam dam, ei bil thi thi' ti ṭhin Mizote tih atana mawi a ni lo," an ti.

ZPM Ṭhalai chuan, "Kan chhungte damlo pawh kan thei lo leh ṭhenawm khawvéngte lusún hnêm tur pawha kan kal theih loh lai te, kan Pathian biak-in tak ngial pawh khâr ngai khawpa hun khirh kan hmachhawn laia ṭul loa sum tam tak lo sèn ral hi ṭha kan ti lo a ni," an ti a; mipui rilṭàmna leh tawrhna hre phâk sorkar Mizoramin a mamawhzia a lang chiang hlea an hriat thu an tarlang.