Nuai 12,044.20 hû project tlangzarh; Sum hi thil dangah a hman theih loh - CM
Lawngtlai district tana buatsaih cheng nuai 12,044.20 man Sports Infrastructure Development Project 14 chu nimin khan chief minister Zoramthanga'n CMO conference hall-ah bul ṭan theih turin a tlangzarh.
Ramin hun khirh an tawn mek chu hmachhawn dan azirin ṭhangthar zel tan entawn tlak an nih leh nih loh a hril dawn tih sawiin CM Zorama chuan, "Ṭangrual takin theihtawp chhuahin mi dang tana entawn tlakin kan theih ang ang kan thawk zel tur a ni. Tuna sports development atana sorkar laipui aṭanga sum hmuh hi state-in mamawhna dang a neih atan hman theih a ni lo," a ti a; project tlangzarh tâkte chu a hmanna tura ruahmanaah chiah hman theih a nih thu a sawi.
CM Zoramthanga chuan, ṭhalaite tana infiamna lama hmasawnna tur hmalakna thar pui tham tak bul ṭan a ni chu lawmawm a tih thu sawiin, "Sorkarin mipui hmasawnna tura hmalakna hrang hrang a siamte hi a nih ang tur taka puitlin tur chuan mipui ṭawiawmna leh thlàwpna a pawimawh," a ti a; sorkar chauh ni loin, mimal leh tlawmngai pawlte thawhhona leh inlungrualna a pawimawh thu a sawi.
Sports minister Robert Romawia Royte pawhin thu sawiin, harsatna sawi sèn loh karah Chief Minister hoin sorkarin ṭan a lâk thu a sawi a, "Hun rei lo te chhungin kan election manifesto tam tak tihhlawhtlin a ni a, tihhlawhtlin zel tum a ni. Ka department enkawl aṭanga manifesto kan tihhlawhtlin lian zualte chu Mizoram Sports Policy 2019 te, sport industry status pekte leh sport person-te puala 5% job reservation siamte leh thil dang tam tak sawi tur a awm," a ti.
Lawngtlai district tana hmasawnna tur puanzarna inkhawm chu rokhawlhna avangin ṭum hnih ṭhulh a nih thu sawiin Sports Minister chuan, "Heng project aṭang hian sorkarin tax leh cess tam tak a dawng dawn. Mi tam takin eizawnna an neih dawn bakah kan ram mamawh em em ṭhalaite tan infrastructure ṭha Lawngtlai district-ah a awm ve tawh dawn a ni," a ti a; ṭha tak leh rang taka hna thawh a nih theih nan district mipuite chu ṭawiawm turin a ngen a ni.