Silchar-a lirthei tángte an chhuahtir Lirthei dang chhuah tura hmalak a ni
Silchar Mizoram House-a Mizo lirthei tángte chu nimin chhun dar 12:30 vel khan Assam police vènna hnuaiah Mizoram hruai thlen an ni. Lirthei dangte erawh chu chhuahtir an ni lo a, he thu ziah lai hian Vairengte leh Lailapur aṭangin lirthei chhuahtir tum mek a ni.
Silchar Mizoram House aṭang hian tanker 11, gas phur truck 11, Pik-up truck pahnih leh private car pathumte chu Assam police venna hnuaiah Mizoram pantir an ni a, Vairengte thlangah Mizoram police-te'n an lo dawngsawng. Lirtheia chuangte chu Covid-19 an vei leh vei loh endik an nih hnuah an kalna tur lam pantir an ni.
Zoram Drivers' Union (ZDU) chuan, Silchar-a Mizo lirthei tangkhangte chhuah an nih avang hian Mizorama lirthei an dante chu nimin tlai dar 4 vel aṭang khan an chhuahtir ve bawk.
Vanglaini palai zawhna chhangin ZDU general secretary KC Lalnunzawma chuan, an duh ber Silchar-a Mizo tángte chhuahtir an nih avangin lirthei dan an tihtawp thu a sawi a, "Mahse, a tahtawl tê têin kan chhuahtir. Vawi leh khata kan chhuah huk chuan traffic-ah harsatna a awm a hlauhawm," a ti.
Kolasib DC Dr H Lalthlangliana chuan nimin tlai dar 5:15 vel khan Vanglaini palai zawhna chhángin, Vairengte leh Lailapur aṭanga lirthei chhuahtir dan turah ruahmanna an siam mek thu a sawi a, "A tahtawla kan kaltir loh chuan truck full load rit tak takte an ni a, an intawh buai a hlauhawm. Chu bakah, lirthei intlar pût an ni tawh a, an chhuah chak theih a rinawm loh," tiin, lirthei chhuahtir danin hun a duh rei tur thu a sawi.
Kolasib SP Vanlalfaka Ralte pawhin nizan dar 6:30-a Vanglaini palai zawhna chhangin lirtheite an rawn chhuah chhoh theih a beisei thu sawiin, "Keini lam aṭangin kan chhuah thla ṭan tawh. Cachar SP nen pawh kan inbe pawp reng e," a ti.