Fury hmachhawp Anthony Joshua

Deontay Wilder hneha boxing khawvel nghawr nghingtu Tyson Fury chuan Anthony Joshua chu a hmachhawp a nih thu a sawi a, Joshua hi a tawng thei a nih chuan a career a famkim tur thu a sawi. 

Fury hian Pathianni zing khan round sarihnaah Wilder a knockout a, WBC heavyweight champion thar a ni - Joshua kawnghren kawl lai IBF, WBO leh WBA  title ten a lung an len nghal a, Joshua lam a hawi zui. 

Kum 31 mi Fury leh Wilder hian an contract-ah a vawi thum nana inhnek leh theihna dan an ziak tel a, American boxer Wilder hian Fury hi a cho leh a nih chuan British boxer hian a hawisan thei dawn lo. 

Mahse, Fury chuan, "Boxer pakhat, min hmachhawn chak tak a awm mai thei asin - chu pa nen chuan kan intawng thei a nih ngat chuan ka duhthusam a kim ang," a ti a, Joshua tum a châk hle. 

Kum 2015 khan Fury hian boxing legend Wladimir Klitschko a hneh a, mahse a hnu lawkah rilru lam harsatna neiin a kawnghren hlawhchhuah WBA (Super), IBF, WBO leh IBO title-te chu a kalsan. 

Mahse, Britain boxer rothap hi thla 30 hnu zetah ring chhungah a lo kir leh a, December 2018-a Wilder nen an intawn hma khan fight pahnih a hmachhawn leh hman - kum 2020 a her chhuak a, fight ropui ber pawl pholangin Wilder a tukdawl leh ta. 

Fury hian Wilder a hneh hnua media ho a hmachawnnaah, "Ennawm ropui tak ka chhawp chhuak a ni lawm ni?" tiih bul a ṭan a, a trainer thar SugarHill Steward puihna hnuaia result ropui zawk a phochhuah zel tur thu a sawi zui. 

6ft 9in a sang boxer chuan, "Ka style thar nen bul ka ṭan chauh a ni. Kan hmaa ding apiang chu kan tukdawl zel ang a, nuamti takin ka awm ang. Ka pian hma reng aṭanga vohbik ka ni a, vawiina ka hnathawh hi thawk tura duan ka ni," a ti. 

Fury hian Deontay-a'n amah hmachhawn tura an contract neihsa a tih nun leh ngei a rin thu a sawi a, American boxer hian a vawi thum nana Fury a hmachhawn duh a nih chuan ni 30 chhungin contract hi a ziah thar leh a ngai thung. 

Hetihlai hian ngaihdan tam zawkah chuan Wilder hian Fury a hmachhawn nawn duh loh rinna a lian zawk - Pathianni zinga an inhnekah kawng tinrengin Fury a chungnung a, mualpho nawn a duh an ring lo. 

Joshua promoter Eddie Hearn chuan Fury hian Wilder a hmachhawn lo a nih chuan a boxer leh Fury an intawn ngei theih nan theihtawp a chhuah tur thu a sawi a, "Boxer pakhatin heavyweight title pali a vawi khat nana a kawl vek lai hmuh hi a châkawm a ni," a ti. 

Hearn chuan, "Ka sawi tawh a, sawi chian lehzual ka duh. Joshua leh Wilder hi an inhmachhawn ngei ka duh a ni," a ti - Fury chak lai kha Matchroom Boxing-a Hearn-a thawhpui Frank Smith leh Joshua manager Freddie Cunningham-te chuan a hmunah an en. 

Hearn hian Joshua a biak tawh thu a sawi a, boxing fan-te an awm hle hle thei lo. Promoter lar chuan, "Joshua nen pawh kan inbe tawh a, Fury hmachhawn ngei a duh. Tyson Fury hlauhna pakhatmah a nei lo a, kawnghren awm zawng zawng kawl a duh," a ti. 

Joshua hi association lam danah chuan Kubrat Pulev hmachhawn leh phawt tur a ni a, Pulev hi Fury-a promoter Bob Arum nen tho an thawk dun - Fury leh Joshua hi an inhmachhawn duh tak tak a nih chuan kawng a awm tihna a ni. 

Kum 30 mi Joshua hian vawi 24 inhnek a hmachhawnah vawi khat chiah tlawm a la nei a, heng zinga vawi 21-ah hian a khingpuite a knockout - June 2019 khan rin loh takin Andy Ruiz Jr. chu ngam lo mah se December 2019 khan a hneh let. 

Fury erawh Wilder a hneh leh tak avangin vawi 31 fight a hmachhawnah a la tlawm miah lo a, vawi 30 hnehna changin vawi khat a khingpui a draw - draw result a neih awmchhun pawh hi December 2018-a Wilder a inhnehtawkpui kha a ni.