Zaninah Champions League 2012 final rematch Chelsea Vs Bayern Munich

Stamford Bridge-ah zanin dar 1:30 hian Chelsea leh Bayern Munich an inkhel dawn a, 2012 Champions League final rematch hi a hmuhnawm ang.

Allianz Arena-a Chelsea-in Champions League nomawi an chawi kha kum riat liam ta chauh ni mah se he hun rei lote chhungin a danglam ta hle. Final-a Chelsea captain Frank Lampard-a'n London club a enkawl tawh a, player inlan tur zingah Bayern Munich keeper Manuel Neuer leh Jerome Boateng te chiah 2012 final boruak khelmuala tem an awm tawh.

Chelsea-in N'Golo Kante, Christian Pulisic leh Callum Hudson-Odoi te hliam vangin an chhawr theih a rinawm lo a, chutihrualin Tammy Abraham, Andreas Christensen leh Ruben Loftus-Cheek te erawh mamawh dan a zira chhawr theih an ni tawh ang.

Bayern-in Niklas Sule leh Ivan Perisic te an la hmang thei dawn lo a, malpui hliam nei Javi Martinez dinhmun a la chiang lo bawk. Team pahnih player hliam neih dan thlirin English club channa a nasa zawk tiin a sawi theih a, chutihrualin Lampard-a hote hian player hliam nei nual chungin Tottenham Hotspur an hneh.

Bayern Munich-in Paderborn an hmachhawn ṭumin tlarhnungah player panga an hmang. David Alaba, Lucas Hernandez leh Joshua Kimmich te defence laiah awmin Alvaro Odriozola leh Alphonso Davies ten mual sir 

aṭangin an nawr.

Paderborn nen hian tlarhnung a pawp a, goal hnih ngawt an chhuah. Chutihrualin Benjamin Pavard leh Jerome Boateng a khel thei lo a, Chelsea nen erawh an inlan thei dawn. Chutia nih chuan Pavard mual sirah awmin Boateng leh Alaba an inkawp ang a, left back-ah Canadian defender hmuhnawm Alphonso Davies a awm thei ang.

Chelsea inven ṭulna tur erawh Bayern tlarhma an ni a, English football-a hlawhchham Serge Gnabry hi tunah chuan player ṭha zawk a ni tawh. Gnabry hi Robert Lewandowski leh Thomas Muller te nen an inkawp a, an ṭha tih Bundesliga-ah an nemghet tawh. Heng player ṭha chawm tur hian Thiago Alcantara leh Kimmich te an awm a, Stamford Bridge-ah attacking football hmuhnawm an khel thei ang.

Frank Lampard-a'n player ṭha ber a kawl lo chungin football hmuhnawm a chhawp chhuak thei a, English manager hian huaisen takin player hmabak nei êng te a chhawr ngam. Chutihrualin Blues hian 'risk' an lak huai avangin Premier League-ah point an hloh fo tawh a,Champions League-a tawnhriat nei ṭha Bayern lakah fimkhur a ṭul dawn.

Tammy Abraham dam tawh mah se tawnhriat nei ṭha Olivier Giroud inlan tur inkhel pawimawh a tih theih a, World Cup champion tawh player hi boruak sangah chuan Michy Batshuayi ai pawhin a thlanawm zawk. Stamford Bridge ni mah se tlarhnung tihphui hmasak a ṭul dawn a, Willy Caballero-a'n match li chhung bul a ṭan tawh avangin khawvel keeper manto ber Kepa Arrizabalaga-a'n bench a la mawi ang.

Lampard hian tlarhnungah Cesar Azpilicueta, Andreas Christensen leh Antonio Rudiger bakah mual sir aṭanga nawr turin Reece James leh Marcos Alonso te an nei a, an ṭha. 

Kante awm leh chiah se tlarhnung phui zawk tura ngaih a ni a, chutihrualin French midfielder hi awm lo mah se Jorginho leh Mateo Kovacic te an awm. Tlarhma pui turin Mason Mount leh Ross Barkley te an awm a, Blues hi 2012 Champions League final-a an hneh tawh hi hneh nawn turin an ṭha tawk.

February 18, Thawhlehni zan

Atletico Madrid 1 - 0 Liverpool

ALT :    Saul Niguez 4'

Borussia Dortmund 2 - 1 PSG

DOR :    Erling Braut Halaand 69', 77'

PSG :    Neymar 75'

February 19, Nilaini zan

Atalanta    4 - 1    Valencia

ATA :    Hans Hateboer 16', 62'; 

    Josip Ilicic 42';

    Remo Freuler 57'

VAL :    Denis Cheryshev 66'

Tottenham 0 - 1 RB Leipzig

LEI : Timo Werner 58' (P)

Zanin Inkhel Tur

Chelsea    1:30 AM    Bayern Munich

Napoli    1:30 AM    Barcelona

February 26, Nilaini Zan

Lyon    1:30 AM    Juventus

Real Madrid 1:30 AM    Manchester City