A REH TA VANG VANG E

Mizote hi thil han phurpui hlut, rei erawh daih mang lo, sakhi zan khat thau an sawi ang deuh hi kan ni fo thin a. Arbawm chhe kang ang deuh hi kan ang hian ka hre fo thin. Nikum 2019 khan ruahtui a tam khawp a, tun kan hai lo. Ruah sur lai khawpui rik lai, khawdur lai, a ni e, zan thimah social media tam takah phai lam atanga naupang ruk hmang leh thah hmang an lo kal, tih thawm kha a ring em em a, a lian em em bawk a nih kha kan la hrereng awm e. 

Chutah zan khua a lo thim a, ruah a sur a, current a awm lo zui, social media lamah naupang ruk hmang chanchin awihawm tak tak an sawi a, han chhunzawmpui tur thei lah bo suh. A hlauhawm em a, zanah phei chuan thil in bul hnai dawr tea  lei tur pawhin naupang kan tir ngam lo a chha chu a nih kha. Hlauhna thlarau khan kan ram hi, aw sual thim lungngaih thlak tak hian chhumpui zing angin min tuam, min tih khum kha a ni ber mai. 

Naupang ruk hmang, thah hmang engtin nge Mizoramah an lut tih an hriat theih kha mak hi ka ti em em a. An sawi pawr-awihawm phian thei zel bawk si. Chutianga misual an nih chuan tinge an mana jail-a an khung mai loh? Tih kha ngaihtuahnaah a lo lut thin a. Chutah a thenin ruahsur hnuaiah zan reh tawhah kan hriat ngai lohten kawngka an rawn kik a…tihte an han sawi phei chu keini ang pa dawizep deuh phei chu awmhmunah kan khur ru der der hial mawle! 

Hun a lo kal deuh a, kan police officers-te atangin chutianga naupang ruboa thah hmang an lo kal an hriat loh thu an chhuah hnu kha chuan, naupang ruk hmang thah hmang an lo kal, tih ang vel chhum zing chuk kha chu a kiang ta duak a, a reh hian a reh ta vang vang a, tun thlengin a reh ta rih chu a nih hi. Thil hria intia khatiang lama thu theh darh peih takte pawh thehmeh ang maiin an reh ta thuap a. Thuhrilhtu leh zaipawlte pawh an lo reh thuap tawh ang, tih ang khan.

Reh ta vang vang leh tur lo awm leh ta nia ka hriat chu, lo chhut ve teh le. Cancer natna atan Bachhim a tha, chumi khami pawh chuan a dam phah, tih thawm kha a lo lian leh ta em em mai a, Zoram hi chhum var dir diar ruahtui pai lo ang hian rang takin a khuh chhuak a, vahchap a kang duai duai ang hian a kang a ni ber.Bachhim chu a lar ta em em a, a hre mang lo leh ngaihven ngai lo khan kan ngaihven a, cancer damdawia tha ta em em engtehchiam ni lo kha thil hlu tak a  lo nih phah ta a nih hi. Engahmah kan ngaih loh kha hralh nuam tak a lo ni a, a tha phian.

Chutia a ngeih chuan tiin kei pawh duhsaka hmangaihtuten thingtlang lam atangten min lo thawna  ka lawm hle a. Tam tak chu ka ei a ni. Mi dang pawhin n ei ve tho mai. A ngeih tak viau erawh ka hre lo a, a ngeih loh pawh ka hre chuang lo. Ka hriat nu pakhat ei ve erawh chuan ngeih loin a inhria a, a insawisel phah a, a  ei chhunzawm ta lo a ni. Khatia ring taka bachhim cancer atan a thatzia a rik tak hluai hnu kha chuan, chu pawh chuan a ngeih tih  emaw chu chuan erawh a ngeih lo ve thung, han tih thawm erawhchu a reh vang vang a, tun tleng hian a la reh tluang ta zel niin ka hria. I ei ve em? tih hi zawhna eng emaw changa kan hmuh leh zeuh chu a ni ber.

Hei hi ni ta berin ka hria, rik hlut chang a awm a, a reh leh vang vang hun a awm leh thin niin ka hre ta. A  ni e, pangpar mawi takte pawh hi a vul hun a awm a, a chuaia a reht tak vang vang hun hi a hnuah a awm leh thin. A hnuhnung chuan a hmasa chu a zui bawk thin a ni. Keini a anpui ngeia a siam  mihringte pawh hian vanglai hun, rik hlut hun kan nei a, mahse kan damlai ni thlana kan pelh hnuah erawh chuan kan reh vang vang tawh ngei ang. Thei tui tak a hmin tuiti taka kan ei thinte pawh hi a rah hun hmin hun a lo pelha a lo zawh hunah chuan a reh leh ta vang vang thin a nih hi.

Keini pawh hian kan vul hun chhung leh theih ve lai, kan reh vang vang hun a thlen hma hian mi dangte tana kan tangkai ve theihna kawngah tan kan la zawk dawn lom ni? Reh vang vang hun hi a la thleng dawn si a, chumi hunah chuan duh mai ila kan ti thei dawn tawh  si lo va. Mi dangte that lohna lai sawi leh hriasak a, an thatna lai haider hi kan ching fo a, chu chuan lawmna a thlen si lo. Chu ai chuan kan  reh vang vang hun a thlen hma hian mite thatna lai leh mawina lai zawk hmuhsaka sawisak hi kan bat a ni dawn lom ni?