Israel-in missile-in Gaza leh Syria a kap
Israel sipaite chuan Pathianni khan Gaza leh Syria chu missile-a an kah thu an sawi.
Missile an kah chhan hi Pathianni zing lam khan Gaza aṭanga rocket 20 vel Israel chhim lamah kah luh hmasak a nih avanga an chhan letna a nih thu Israel sipaite chuan an sawi. Israel health official-te chuan an rama rocket kah luh a nih avang hian thi leh hliam an awm lo niin an tarlang.
Israel sipaite hian missile an kah luh chungchangah hian Palestinian militant group Islamic Jihad-te kah an tum ber thu an tarlang a, Islamic Jihad member ṭhenkhat an hliam bakah, ramri hungna a chhiat thu an tarlang tel bawk.
Missile an kah avang hian Gaza-ah chuan mi paliin hliam an tawrh thu Gaza health official-te chuan an tarlang a, thi erawh an awm loh thu official-te chuan an tarlang bawk. Syria hian Israel missile kah tam zawk chu an air defence hmanga an lo kah thlak hman thu an tarlang thung.
Buaina lo chhuah chhan hi Israel sipaite chuan Pathianni khan Gaza nena an ramriah Palestinian ten bomb tihpuah tur an kam niin an sawi a, heng mite hi Israel sipaite chuan silaia kap in mi pakhat an kahhlum thu leh sipai bulldozer-a a ruang chu lak sawn a nih thu Israel sipaite hian an sawi.
He thil thleng chungchang hi Gaza photographer ten video-a la hmanin, video footage hi social media-ah thehdarh zui a ni. Islamic Jihad-te chuan Israel-in an thah tak hi an pawl mi a nih thu tarlangin, Gaza aṭanga rocket hmangin Israel chhim lam hi an kap zui ve nghal a ni.