Good Friday leh Easter Sunday-ah Vanlalsailova Siamtharlehna Fakzai
Gospel singer leh speaker Vanlalsailova chuan Good Friday leh Easter Sunday lo awm turah hian zan lamah Zonet Cable TV-ah Siamtharlehna Fakzai hun a hmang ṭhin dawn.
Sailova hian April 10 (Good Friday) zan bakah a tuk Inrinni zanah hun a hmang ang a, April 12 (Easter Sunday) zan thlengin hun a hmang dâwn a, Zonet TV chuan live-in an pe chhuak ṭhin ang.
Sailova hian Covid-19 avanga mipui pawn chhuak thei loa inkhar khipte pualin tun hnaiah a chenna on Dawrpui Veng aṭangin concert hlawhtling tak a lo buatsaih tawh a, a chhevel mipuiin hmun remchang awm apiang aṭangin an thlir a, mipui sing chuangin Instagram leh YouTube aṭangin an chhim bawk a ni.
Hei bakah hian Zonet chuan hetiang hian Pathian thu lam hawi programme a duang:
Zanin April 3 leh nak zan April 4 dar 8:00-ah Tual Upa R Lallungmuana'n Pathian thuchah a sawi ang a, April 6 (Thawhṭanni) aṭanga April 8 (Nilaini) zan dar 8:00-ah a sawi chhunzawm ang.
April 5 Palm Sunday zing dar 10:00-ah Rev J Lalremsiama'n thu a sawi ang a, Palm Sunday zan dár 8:00-ah Upa C Ngurthantluanga'n thuchah a sawi ang.
April 9, Venpui Zan (Maundy Thursday) zan dar 7:00-ah Rev Vanlalrova Khiangte, Synod Secretary-in thuchah a sawi ang a, hemi zawh hian Ṭhuatmuan Rimawi Live-a pek chhunzawm a ni ang.
Good Friday leh Easter Sunday chhun lamah kohhran hrang hrang hruaitute'n Pathian thuchah an sawi ang a, zan lamah Vanlalsailova'n Siamtharlehna Fakzai hun a hmang ang.