Awwww a na Roger!
Roger Federer chuan Wimbledon 2020 an khel thei dawn lo tih a hriat chuan Twitter lamah a pawi tih thu a sawi chhuak nghal, player dang pawhin pawi ti mah se 'Roger leh Centre Court' inzawmna hre tan chuan hnuk ulhna tham a tling.
Wimbledon vawi riat champion tawh Federer chuan, "Ka rilru chhungril phawrh chhuak thei thil tarlan tur a awm rih lo," tiin a ziak a, a thu ziak chungah hian 'Thamral' tih a tarlang bawk.
Grand Slam vawi 20 champion tawh Federer hi kum 38 mi a ni tawh a, kumin August 8 hian kum 39 a ni ang; nakkuma Wimbledon an khelh leh meuh chuan kum 40 a tling thuak tawh dawn tihna a ni.
Swiss star hi Wimbledon ti hlutu a ni a, inelna danga a chet ṭhat vak loh pawhin All England Club hi a innghahna a ni. Season hmasa khan championship point vawi hnih a hmuh a chhawr ṭangkai theih loh avangin Novak Djokovic a ngam lo.
Wimbledon khelhna zinga an ngaihhlut leh ropui ber Centre Court hian Federer nen inzawmna thuk tak a nei, a khat tlata inkhel entu hi 'Roger, Roger, Roger' tiin an au rual ṭhun, kuminah erawh theh meh ang maiin a reh dawn.