Covid-19 rinhlelhte endikna khâwl Detection Laboratory enchhin mek

Health minister Dr R Lalthangliana chuan nimin khan thuchah sawiin, Covid-19 Detection Laboratory chung chang a sawi a; laboratory chu State Referral Hospital-a building fál deuh taka awm, TB building-ah siam a nih thu sawiin, "Core Committee din aṭanga ni 8/9-naah laboratory kan nei thei hi a lawmawm hle a ni," a ti.

Dr R Lalthangliana chuan, laboratory chu din mah se, Covid-19 endik turin testing kit pakhatmah ZMC-ah a awm loh thu sawiin, "Test kit kal dan hi Delhi aṭangin ICMR-in hmarchhakte tan Dibrugarhah an rawn dah a, Dibrugarh aṭangin NE state dangah a ṭul angin an thawn chhawng leh ṭhin a ni. Silchar Medical College-a an hotunu hnenah test kit min hawhtir turin ka ngen lui a, nimin tlaiah Silchar-a Assistant DRC kan laktír a, test kit 90-100 inkar min hawhtir a ni," a ti a, a lawm thu a sawi.

Health Minister sawi danin, test kit-te chu April 1, Nilaini tlai dar 5:30 velah Mizoram House motor-in phurh chhoh a ni a, zan dar 11 velah ZMC thlenpui a ni. Dr R Lalthangliana chuan, laboratory enkawl turin SMCah ZMC-a doctor leh technician pahnih ve ve tirh an nih thu sawiin, "Kar hmasa khan kan intír thla a, nimin piah (March 31) tlai khan training an zo a, certifi cate dawng thlapin kan khawl khawih thei turin an training chhuak a ni," a ti. Laboratory enkawltu tur bik a hranpa hlaka la thar turin an inbuatsaih mek thu sawiin, "ZMC hi society a nihna angin ZMC staff anga lak mai tura tih a ni," a ti bawk.

Covid-19 spokesman Dr Pachuau Lalmalsawma chuan Vanglaini palai zawhna chhangin, Covid-19 Detection Laboratory chu nimin khan enchhin a nih thu leh, a tak taka hman a nih hmain test-te pawh la tih chhin tur a nih thu a sawi a, "Result hriat chian saah test tihchhin tur a ni a, chuta result-te chu ICMR-ah thawn leh a ngai a, ICMR-in a tak taka kalpui tura a pawm hnuah hman tak tak theih a ni ang," a ti.

Laboratory din chhoh dan Coronavirus endikna khawl, Covid-19 Detection Laboratory neih a nih theih nan March 23, 2020-ah Health Minister hoa a pisaa ṭhu khawm chuan kawng zawn an rél a, bawhzui turin Health Secretary kaihhruai Core Committee din niin, MLA eng emaw zat an tel a, ni 12 chhunga report peih tura tih an ni. Core Committee chu March 24-ah an ṭhu a, ZMC pawh an tlawh a, laboratory dinna turin ruahmanna siam nghalin, hemi ní hian report an thehlut.

Laboratory chu BSL-3 awmna, ZMC-a Central TB Division Laboratory, FIND and Helixar Solutions-in an siam mek, 90% an zawh tawhnaah din an rawt a, phalna hmuh a nih angin hmalak nghal a ni. Laboratory atan hian ZMC bakah, MZU, Central Agriculture University, RIPANS, PUC leh NHM hnuaia NTEP-te'n ṭan an la a; tuna an peih takah hian Indian Council of Medical Research (ICMR)-in Covid-19 endikna atana hmanrua (laboratory equipment) a duh ang a awm kim. March 25 khan laboratory enkawltu tura tih mi pali chu Silchar Medical College-ah training tura tirh an ni.

Mizoram sorkarin laboratory bul ṭanna atan cheng nuai 40 a pe a, hmanrua lei kim nghal theih a nih loh avangin zirna-in dangte'n hmanrua leh bungrua an hawhtir. NHM (NTEP)-in BLS -3 chamber & equipment, MZU State Biotech Hub & Department of Biotechnology-in RIPCR, kits, laboratory plastic ware & consumable te, PUCIBT Hubin RIPCR, kit & consumable te, CAU Selesihin RIPCR & kit te, RIPANS-in multichannel micropipettes an hawhtir a; ZMC-in deep freezer, safety hood leh hmanraw mamawh dangte an thawh bawk.