Rpa Ralte leh Rinhlui Pialtu hun a thleng

Honda Dio Ṭhazual Lengzem chart-ah Rpa Ralte ft. Rinhlui Pialtu 'Lo Kir Leh Mai Rawh' chu pakhatna a ni a, Rdi 'Bold V.2 (Confession)' chu pahnihna niin Teawmi 'Facebook' chu pathumna a ni bawk.

Ṭhazual chart 'follow' tu tan chuan Rpa Ralte leh Rinhlui Pialtu-te hla mawi tak 'Lo Kir Leh Mai Rawh' hi chart-a a mikual tawh lohzia an hre ngei ang. Nikum November thla tawpah khan he hla hi tihchhuah a ni tawh a, December thla tir aṭang khan chart-ah lang nghalin dinhmun sang tak takah pawh a ding tawh ṭhin a, mahse pakhatna em chu an la ni lo.

Chart hmasaah khan pathumnaah an rawn inhlangkai a, tun ṭumah erawh an hun a thleng ta a, Ṭhazual chart roreltu an ni ta. A mal ve ve pawha Mizo zai­thiam lar tak ni ve ve theite thawhdunna hla hi a mawi a, pakhatna dinhmuna an ding thei pawh hi a mak lo hle. YouTube lamah pawh mi nuai chuangin an thlir tawh a ni.

Hun rei tak a reh hnuah nikum kum tawp lamah khan hla thar a rawn nei a, rap music tuipuitute chuan an tuipui leh nghal hle. Rdi chuan a hla thar ber Bold V.2 chu pahnihna a rawn nihpui ta a, chart hmasaah khan parukna ni mah se tun ṭumah erawh a rawn invawrh sang hle a, dinhmun ṭha bera ding turin hmabak a nei eng hle.

Teawmi, Marshall leh DJ-i

Chart hmasaa pakhatna Teawmi 'Facebook' chu pathum­naah a awm ve thung a, Marshall Fka Ft Lazzy 'Kumtluang atan' chu pariatna aṭangin palinaah a rawn invawrh bawk. DJ Lalvenhimi chuan chart-a pakhatna pawh a lo nihpui tawh 'Ka dawn lungruk' hmangin chart Top 5 a khar a ni.

Honda Dio Ṭhazual Lengzem Top 10

1    Rpa Ralte ft. Rinhlui Pialtu     'Lo Kir Leh Mai Rawh'

2    Rdi    Bold V.2 (Confession)

3    Teawmi    Facebook

4    Marshall Fka Ft Lazzy    Kumtluang atan

5    DJ Lalvenhimi    Ka dawn lungruk

6    Thiamchantira    Hringnun hi

7    Ruth Z Fanai    Ka rim ang che

8    Dinmawia Chawngthu     Inhlan zel ang

    ft. Lawmkimi Chawnghlut

9    Mimi Remruatsangi    Vul zel rawh aw

10    Didika Chhakchhuak    I lo bei reng si