Chief Minister-in mau hmanga Mizoram Enkawl a tum dan beidawnthlak ti

Nimin khan Mizoram People Conference party office bearers-te chu an president Lal­hmangaiha Sailo kaihhruaiin an party pisaah an ṭhukhawm a, resolution pathum pass-in chung zingah chuan chief mi­nister Zoramthanga'n ruahmanna fel nei hmasa loa, mau hmanga Mizoram enkawl a tumna chu beidawnthlak an tih thu a tel.

Lalhmangaiha Sailo chuan budget session kal mekah supplementary demand sawihona nei miah loa samkhai taka kal tlangpui a ni leh ngawt ṭhin chu thil pawi tak a nih thu sawiin, "MLA-ten supplementary demand vei zuina an neih loh avang­a a nghawng pawi theih dan tur an thlir pha lo kha pawi ka ti. Tun hnuah chuan MLA-te'n supplementary chungchang zirchianga, awmze nei taka kalpui anih theih nan, mutmawh hnarmawhah neih tawh ka duh hle," a ti.

MPC resolution pass-te : 

l    Brig T Sailo kaihhruai PC ministry in Aizawl khawpuia cheng Assam Rifle-te Zokhawsanga sawnchhuak tura ruahmanna a lo neih tawh, kum 30 a ral tawh hnu vawiin thleng pawh a tihpuitlin a la ni lo hi a rang thei ang bera sawnchhuah an nih tawhna turin, tun aia chak zawka hmalakna kalpui tawh turin Mizoram sorkar kan phut a ni.

l    Chief minister Pu Zoramthanga'n ruahmanna fel tak nei hmasa loa, 'Kan zir chawp, kan dap chawp leh kan phuah chawp,' tih thupuiah nei a, mau hmanga Mizoram min enkawl a tumna hi MPC party chuan a beidawnthlak kan ti a, a tlai chhiat hma ngei a in lamlet a, 'Hydel Power Project' buaipui zawk turin Pu Zorama kan chah a ni.

l    Dan loa Bangladesh aṭanga Mizorama lo lut ru Chakmate dap chhuak a, thawnkir hna thawk tak tak tawh turin Mizoram sorkar kan phut thar leh bawk  a ni.