Bawlhhlawh ṭawih thei loah harsatna tâwk

Aizawl Municipal Corporation (AMC) chuan SIPMIU-in an siam Solid Waste Management Centre (SWMC), Tuirialah Aizawla bawlhhlawhte an paih lut tawh a, tun dinhmunah Aizawla veng 57-in an paih mek. Hetih lai hian, bawlhhlawh paih lirthei khalhtute chuan ṭawih thei lo bikah harsatna an tawk ṭhin.

SWMC-a bawlhhlawh paihtu driver-te chuan, ṭawih thei bik an phurh chuan mipuiin an thliar ṭhat avangin tuna SWMC enkawltu SIPMIU lamin an kaltlangtir tlangpui thu leh, ṭawih thei lo an phurh cháng erawh chuan mipuiin an thliar ṭhat tâwk loh avangin luh theih loh cháng an nei tih an sawi.

Bawlhhlawh ṭawih thei lo an phurhte mipuiin in lama an thliar ṭhat tâwk loh avangin SWMC-ah an luhpui theih loh cháng a awm a, chuvang chuan kawng dungah an din phah thu an sawi a; chutianga harsatna an tawh cháng chuan AMC hotute an biak ṭhin thu leh, bawlhhlawh chu paih a ngaih si avangin bawlhhlawh paihna hlui zawk (dumping ground)-ah an paih mai ṭhin thu an sawi a ni.

SWMC enkawltute chuan, bawlhhlawh ṭawih thei lo zingah ṭawih thei a tel cháng a awm avangin hna a tam phah thu leh, bawlhhlawh paihtu mipuite'n bawlhhlawhte chu in lamah thliar hrang hram hram se an duh thu an sawi bawk.

SWMC enkawltute sawi danin, bawlhhlawh ṭawih thei leh ṭawih thei lo paih dan chu mumal taka chhinchhiah vek a ni. Ṭawih thei lo dahnaah bawlhhlawhte chu a chi hrang hrang thliar hran leh a ni a, a dah khawmna tur hmun 15 a awm. Bawlhhlawh ṭawih thei lote chu a remchang angin suma chantir dan zawn mek a ni. A ṭawih theite aṭangin changpât leiṭha (vermicompost plant) siam chhuah tum a ni thung.

AMC-in ruahmanna an siam dan chuan, January 2020 aṭangin Aizawla veng 19-a bawlhhlawhte SWMC-ah dah luh ṭan a ni a, February thla tìr lam aṭangin veng dang 38-a bawlhhlawhte dah luh leh ṭan niin, tun dinhmunah veng 57-a bawlhhlawhte dah luh a ni ṭhin. Aizawla veng (local council) 83-a bawlhhlawhte chu kumin March thlaah chuan SWMC-ah dah luh vek tum a ni. Bawlhhlawh phurtu lirtheite hi SWMC gate-ah endik ṭhin a ni a, bawlhhlawh thliar ṭhat tâwk lohte chu luhtir phal a ni lo.

AMC commissioner K Laldingliana chuan, Aizawla chhungkaw tinte'n bawlhhlawh ṭawih thei leh ṭawih thei lo uluk taka an thliar a ṭul thu leh plastic lam chite leh e-waste te chu a hranpaa fûn zel a ngaih thu a sawi a; mipuite chu dawhthei taka bawlhhlawh thliar turin a ngen a ni.