Mi bum ching laka fimkhur turin chah

Mizoram Police chuan thuchhuah siamin, tunlai hian misualte'n internet banking leh smart phone hmanga mi bum dan thar an hmuh chhuah thu tarlangin, mipuite fimkhur turin an chah. 

Mizoram Police tarlan danin tun hnai khan mi pakhat chu BSNL office-a thawk anga in sawi misualin phone number 7029829632 leh 7667216738 hmanga biain, a phone post-paid bill a pek tawh chu lut lo anga sawiin heng phone application pathum BSNL Wallet, Add-on: Huawei(b) leh Team Viewer Quick Support-te play store aṭanga down­load tirin, chumi hnuah internet banking hmangin bill a pek ngei leh ngei loh en nan a account-ah a log-in tir a, hemi hnu hian a account aṭangin Rs. 9,50,218 a lo lak chhuah hman bakah a fixed depo­sit Rs.10,00,000 chu close sakin account hrang hrang­ah a lo transfer sak a ni. He thil thleng chung­changah hian thubuai ziahluh a ni tawh a, chhui mek a ni.