Ramri chinfel dan tura a thil hriat CM-in sawi lawk chiah a ngai lo

Nimin Assembly Session-ah chief minister Zoramthanga chuan Mizoram leh Assam ramri chinfel dan tura a thil hriat chu lo sawi chhuah lawk chi nia a hriat loh thu a sawi.

Congress Legislature Party (CLP) leader Zodintluanga zawhna chhangin Chief Minister chuan ramri chungchanga Mizo­ramin chinfel ngai a neih ber chu  Assam nena ramri a nih thu a sawi a, "Buaina a lo chhuah chuan keimahni lamah ei leh bar lakna kawngah harsatna a awm ṭhin. Chuvangin sorkar kal tawh zawng zawngin kan tih duh pawh kan ti hlei thei lo a ni," a ti.

Zoramthanga chuan ei leh bar lakna leh thil danga inbuatsaih lawk loh chuan ngam loh chala chil hnawm palh tun hmain engemawchen a awm ṭhin tawh thu sawiin, "Kan thil tum lo hrilh lawk vek chu tih chi a ni lo. Inkhelah pawh kan in pass dan tur zawng zawng kan khelhpui turte hrilh lawk chi a ni lo," a ti a, ramri chinfel dan tur lo inzawh sek chu a finthlaka a rin loh thu a sawi.

Zodintluanga chuan ramri buaipuina a rei tawh thu sawiin, "Core Committee-te din a ni a, sum tam tak sen a ni a, Home department an hah hle . Core Committee din kher loin, July 22, 2019 a kan Chief Minister-in ramri buai chinfel dan tur felfai tak kan nei a tih kha kan Home Minister hian kan Chief Minister  hi a lo va zawt dek dek thei tawh em? A hran paa Core Committee-te din loin a chinfel mai theih em?" a ti.

Home Minister chuan 'sawi chi a ni lo e' CM-in a tih thu sawiin, "Sawi chi loh ti na na na ka la zawt bik lo," a ti a, Zodin­tluanga'n a vei em avangin rem­changa a lo zawh tur thu a sawi. ZPM member Vanlalhlana zawhna chhangin Lalchamliana chuan Assembly Session-a pass 'United Nations Declaration of Rights on Indigenous People, 2007' chungchanga private resolution March 15, 2019-a pass tak chu Ministry of Home Affairs-ah a ṭul anga hma la turin May 3, 2019 khan thawn a nih tawh thu House a hrilh.

ZPM member C Lalsawi­vunga zawhna Home Minister-in a chhan danin, kum 2015 aṭanga January, 2020 thlengin ILP 5,53,321 pek chhuah a ni tawh. Hemi hun chhung vek hian ILP valid lo mi 20,765 man an ni a, an zinga 19,220 chu thawnkir an ni tawh. Kum 2019-2020 chhung khan Home department hnuaiah hna lak thar 26 a awm a, heng hnate hi advertisement chhuaha MPSC kaltlanga lak a ni.