Aizawl FC an comeback; Standly a lawm lo

Inrinnia I League inkhelah Aizawl FC-in comeback ropui an lantir a, an mikhualna ramah 2-0 a an hnufual reng hnuin Real Kashmir chu 2-2 in an inhnehtawkpui. 

Srinagar khawpuiah mi­nute 80 thleng pawhin Aizawl FC hi 2-0 in an hnufual a, hun tawp hnaih lama Rochharzela goal hnih khung chu Aizawl FC tan damna a ni. Chak lo tura ngaih AFC-in point an hlawh chhuak a, coach Standly Rosario erawh a lawm lo - Nigerian striker Justice Morgan chu first half-ah a la chhuak a, a sawisel zui. 

Standly chuan, "Foreign player a ni tih a inhre tur a ni a, a khelh ṭhat peih loh avangin ka la chhuak a ni. Morgan hian he club tana khelh zel a duh chuan tiṭha rawh se," tiin Vanglaini a hrilh. 

Aizawl FC hian February 1 khan Real Kashmir hi an mikhual tawh a, Kallum Hig­ginbotham leh Mason Robert­son ten Srinagar club tan goal khungin 2-0 in an tlawm. 

Inrinniah thawnthu ngai kan hmu nawn dawn niin a lang hman - Mason (36 minutes) leh Kallum (54') te bawkin goal an khung a, Joseph Adjei handball vangin penalty an hlawh bawk. Mahse, Kashmir club tan Robin Singh chuan goalkeeper T. Zothanmawia bum mah se penalty hi goal-ah a chantir thei lo a, Mizo club an vannei. 

Aizawl FC tan MPL top scorer MC Malsawmzuala'n minute 84-naah penalty a hlawh chhuak a, Rochhar­zela'n goal-ah a chantir. 

Hun tawp nan minute thum chauh a awm tawh tihah Rochharzela bawk a inlar leh a, MC-a hnen aṭanga a ball hmuh ṭha zet chu ropui takin a khung - goal mawi bik a ni. Aizawl FC hian February thla chhungin away game pathum an nei a, an chak zo lo vek - vawi khat tlawmin vawi hnih an draw. March 10-ah Mohun Bagan an hmachhawn leh ang.