Coronavirus aiin chiai buai vanga nunna chan an tam zawk thei : SC

Supreme Court chuan ram chhung hri leng mek, coronavirus chungchanga thu dik lo thehdarh avanga mipui chiai buaina thleng avangin nunna an chan tam zawk thei a ni, a ti. Hei vang hian sorkar laipui hnenah hri leng mek chungchangah thu dik lo leh dawt thu thehdarh chungah action na taka lak ṭha a tih thu a sawi. 

Chief Justice SA Bobde leh justice L Nageswara Rao awmna bench chuan nimin khan video-conferencing buatsaihin, thu dik lo thehdarh hian mipuite nasa taka tichiain a tibuai a ni, an ti. Sorkar laipui hnenah hri leng mek chungchangah mipuite hnenah thu dik leh rintlak hriattir theihna tur official channel nei turin a ngen. 

CJI chuan solicitor general Tuskhar Mehta hnenah, "Chiai buaina hian hri aiin nunna a la tam zawk thei a ni. Counsellor in mamawh a, mipuite zirtirtu tur, sakhaw tina hruaitu in neih a ngai a ni," a ti. Mehta pawhin sorkar chuan counsellor-te chhawr a;, hmun danga inhlawhfa, lockdown puan vanga mahni khaw lama haw thei loa tangkang mekte kawm a, an chiai buai lohna tura kawm leh zirtir tura sakhaw hrang hrang hruaitute hman an nih tur thu a hrilh.