Manipur board exam zawhna siamah BJP-in an inrawlh lo tih sawi

Manipur-a Class 12 state board examination-a political science paper-a zawhna ṭhenkhat chu Congress party chuan na taka sawiselin, zirlaite rilru-ah politics thil tuhsak tumah an puh. BJP chuan chhang let nghalin, he thilah hian inrawlhna an nei lo tih a sawi. 

Class 12 board exam-a poli­tical science paper-ah zawhna pakhata zirlaite chu BJP election symbol ziak tura tih an nih a, hei hian mark li a pu. Zawhna dang pakhatah Jawarhalal Nehru-a'n India ram tana a thawhna kawnga a thil tih dik tawk lo pali ziah turin tih an ni a, hei hian mark li bawk a pu a ni. 

Congress hruaitu Kh Joyki­shan chuan question paper hi na takin a sawisel nghal a, zirlaite rilruah thil dik lo tuh tumna nia a ngaih thu a sawi. Class 12 exam zawhna hi social media lamah pawh thehdarh zui a ni a, mipuite sawisel a hlawh hle. 

CPI national executive member Moirangthem Nara pawhin hetiang zawhna siam hi thil ṭha lo tak a ni tih a sawi a, veteran politician Okran Joy chuan he thil hi zirnaa politics lakluhna nia a ngaih thu leh, hei hi zirna atan leh democracy atana thil ṭha lo  ni tiin, rah ṭha a chhuah ngai lo ang, a ti. 

BJP thupuangtu Chongtham Bijoy chuan exam zawhna siam chungchangah an party chuan inrawlhna an nei lo tih a sawi a, he thila mawhphurtute chu zawtfiah mai turin a ti. 

Council of Higher Secondary Education (Schools) chairman L Mahendra Singh chuan, "Zawh­nate hi 'Party System of India' chapter aṭangin controller of exami­nation in a siam a ni," tiin a sawi. 

Manipur University Teachers’ Association (Muta) president Maibam Ranjit Singh chuan hetiang zawhna hi siam a ni tur a ni lo tiin, zawhna siamtuin a lo telh a nih pawhin moderator chuan enfiahin a paihsak mai tur a ni, a ti.