J&K-ah internet khuahkhirh a la ni

Jammu & Kashmir thuneitute chuan March 4 thleng 3G leh 4G internet service khuahkhirh a la nih tur thu an sawi.

Union Territory home depart­ment chuan virtual private networks (VNPs) chu sorkar kalh zawnga che ṭhin ten an hman dik loh fo avang leh, J&K huam chhunga firfiaka chetna thleng thei thilah inbiak pawh nan an la hman reng avangin, internet service tih nun a la him tawk loh thu an sawi a ni.

Sorkar laipui chuan nikum August 5 aṭang khan J&K-ah hian internet khuahkhirhna a kalpui ṭan a, vawiin thlengin hman chhunzawm a la ni. Internet khap a nih chhan hi sorkar laipuiin nikuma J&K special status Article 370 a hlih avanga, buaina thleng thei venthawn vang a ni. January 15 khan prepaid leh postpaid connection-ah mobile 2G internet service chu tih nun a ni tawh a, mahse  internet hmangte chuan website 'whitelisted' 301-ah chauh internet site an lut thei thung.

Home Department-a Principal Secretary Shaleen Kabra chuan internet site luh theih hi zawi muanga tih pun chhoh zel a nih thu sawiin, tunah chuan website 1,674-ah luh theih a nih tawh thu a sawi. 

Kashmir Valley-ah hian firfiaka chetna a thlen hlauhthawn thilah duh anga internet tih nun hleih theih a la nih loh thu Kabra chuan a sawi bawk a ni.