Delhi-a buaina thleng vangin Amit Shah-a'n meeting a ko

Delhi hmarchhak lama buaina thleng vangin mi pasarih an thi a, hei vang hian a rangthei ang berin union home minister Amit Shah chuan nimin khan meeting a ko nghal.

He meeting-ah hian Delhi lieute­nant governor Anil Baijal, chief minister Arvind Kejriwal leh political party hrang hrang aṭanga hruaitute pawh an tel bawk.

Thawhṭanni zan khan Delhi hmarchhak lamah hian Citizenship Amendment Act (CAA) dodaltute leh thlawptute inkarah buaina nasa tak a chhuak a, he thil thlengah hian mi pasarih an thi a ni. Thi zingah hian police head constable pakhat a tel.

CAA duh lohna avanga nawrh huaihawtte hian chenna in, dawr, lirthei leh petrol pump an hal chhiat bakah, he buaina hmunah hian  lunga invawmna a tleng bawk a ni. 

Nimin khan pawl hnihte hi inti­buai chhunzawm lehin, tiang leh thir hmangin an inbei zui a, motorcyle an hal bawk. Security force-e chuan mipuite hi hnawh darh an tum a, mahse pungkhawmte chuan lungin an lo tawng zui a ni. 

Police-te chuan Jaffarbad, Mauj­pur, Chandbargh, Khureji Khas leh Bhajanpur-a buaina chhuakah police 48 leh civil mi 98 in hliam an tuar tawh tih an sawi. Buaina a chhuah chhunzawm zel avangin nimin khan Delhi hmarchhak district-ah CrPC Section 144 puan a ni a, venhim hna thawk turin police tam tham tak dah an ni bawk.