Trump leh Modi-te'n defence lamah inremna $tld 3 hu an ziak

India rama ni hnih cham tura rawn zin, US president Donald Trump leh prime minister Narendra Modi-te chu nimin khan Hyderabad House, New Delhi-ah an inbia.

Democracy ram lian pahnih hruaitute hian inbiakna an neih zawh hian thuchhuah inṭawm siamin press conference an ko a, Donald Trump chuan US leh India chuan defence sector-ah inremna $tld 3 hu an ziak tih a sawi. 

Trump chuan, "Vawiin chawhma lamah khan defence lama thawhdunna kan zauh a, India-in America military equipment $tld 3 hu an leina tur inremna kan siam a; chung zingah chuan khawvela ṭha ber zinga mi- Apache leh MH-60 Romeo Helicopter-te pawh a tel," a ti.

Ram pahnih inlaichinna chu a hma ang rengin a ṭha a, India-a ni hnih a cham chu nuam a tih thu leh a bik takin Ahmedabad-a Motera stadium-a an hun hman chu nuam a tih thu a sawi.

PM Modi pawhin, "Thil pawimawh tak tak, defence leh security aṭangin insumdawn tawnna chungchang thleng kan sawi a ni," a ti. 

New Delhi leh Washington chuan sumdawnna kawngah inremna an la ziak dawn a, mahse ram pahnih chuan inremna siam turin inbiakna an nei leh phawt dawn thu a sawi bawk. 

u    Ram pahnih inlaichinna hi kum zabi 21-naa thawhdunna pawimawh ber zinga mi a ni.

u    Vawiin khan president Trump nen Comprehensive Global Strategic Partnership level-a kan inlaichinna kalpui turin thutlukna kan siam.

u    Firfiak thlawptute doletna kawngah nasa zawka thawhdun kan remti.

u    President Trump hian ruihhlo leh opioid buaina a ngaimawh hle. Drug trafficking, narco-terrorism leh organised crime buaina chung­changa hmalakna thar neih kan remti.

u    America hi India tan oil leh gas neih­na kawngah a pawimawh hle a ni.

u    India leh US-in inṭhian ṭhatna bik tak a neih lungphum hi ram pahnih mipuite inkara inkungkaihna ṭha a awm vang a ni. 

u    PM Modi nen kan inbiak­naah kan ram pahnih khua leh tuite chu Islam firfiate lakah venhim an ni dawn tih ka tiam.

u    An ram leilunga firfiakte hnathawh do let turin US chuan Pakistan a thawhpui.

u    5G wireless network pawi­mawhna te, zalenna leh hmasawnna atana tech­nology pawimawhna chungchang kan sawi a ni.

u    Office ka luah aṭang khan US-in India a bungrua a thawn luh chu 60% dawn a ni tawh a, high-quality American energy a thawnluh chu 500%-in a pung tawh a ni. 

a    Trump leh a nupui Melania-te hian nimin zingah khan Rashtrapati Bhavan (presidential palace) an tlawh a, president Ram Nath Kovind leh PM Modi-te chuan an lo lawm a ni.

a    Presidential palace-ah hian Trump hian tri-services guard of honour a dawng.

a    Niminah vek khan Raj Ghat tlawhin, Mahatma Gandhi zahna pangpar an nupain an hlan.