Brazil President-in khung hran ṭul ti lo

Brazil president Jair Bolsonaro chuan an rama coronavirus darh venna atana khung hran mekte tih loh, midang khung hran chhunzawm an ni tawh dawn lo tih a sawi. President chuan inkhung hrang hian mi tam tak hnathawh a tihbuai bakah, mi retheite'n an tuar nasa zual niin a sawi a ni. 

Hri leng dona kawngah Brazil president leh health minister Luiz Henrique Mendetta-te chu an ngaihdan a inkalh hle. President hian tualchhung thuneitute'n in khung hran leh khuahkhirhna dang an hmante chu a sawisel fo a, mahse Mendetta erawh chuan heng hmalakna hi a thlawp hle thung. 

Mendetta chuan Brazil mipuite chu hri inkaidarh tur laka invenna atan social distancing hmang ṭha turin a ngen a, China aṭangin personal protective equipment (PPE) maktaduai 200 an dawng thuai dawn tih a sawi. 

Brazil President hian khawvel tibuaitu, coronavirus leng mek hi a ngai thutak tawk loin 'flu' pangngai leng niin a sawi a, hei vang hian sawisel pawh a tawk fo a ni.   US president Donald Trump pawhin Brazil ram aṭanga luh tumte khapna tur siam a tum tih a sawi. 

Ram hrang hrangte'n an hman mek, hri darh zel tur venna atana social distancing rules an puante pawh president Bolsarano hian sawiselin, an ram economy ngaih pawimawh a ṭul zawk thu a sawi. Hemi chungchang a sawina video hi Twitter, Facebook leh Instagram-te'n an paihsak tawh.