Kareena Kapoor leh Saif Ali Khan Pawisa thawh tum danin sawisel a hlawh

Bollywood actress Kareena Kapoor chuan  a pasal Saif Ali Khan nen Covid-19 dona kawngah  pawisa an thawh dawn tih Thawhlehni khan Instagram-ah sawiin, UNICEF, GIVE INDIA leh International Association for Human Values (IAHV)-te hnenah ṭanpuina hi an pe dawn tih a tarlang.

"Tun ang hun harsaah hian inlungrualin kan inṭanpui tawn a ngai a ni. Kan pahnih (an nupa) in ke pen ṭha kan ti a, UNICEF, GIVE INDIA leh International Association for Human Values (IAHV)-ahte ṭanpuina pein kan thlawpna kan lantir dawn a ni. Midangte pawh hetianga ti ve tur hian kan sawm che u. United we stand. Jai Hind. Kareena, Saif and Taimur," tiin Kareena hian a IG-ah a ziak.

Ṭanpuina pe tur mah ni se prime minister Narendra Modi PM-Cares Fund-a an chhung lo tur chuan social media lamah titi a titam hle a, sawisel pawh a hlawh nasa hle. An fan ṭhenkhatte chuan an duhthlanna a nih thu sawiin lo chhan ve bawk mah se sawiseltu lam thawm a ring hle.