British music film ṭhazual pasarih

Online music magazine  'contactmusic.com' chuan 'Seven greatest British music films of all time' thlangin, kum 2018-a tihchhuah Bohemian Rhapsody chu ṭha berah a thlang. Kum 2007-a tihchhuah Control chu pahnihnaah a dah a, 24 Hour Party People chu pathumnaah a dah bawk. Khawvel hmun hrang hrangah lockdown a thleng dawn tih a hriat khan  'contactmusic.com' chuan heng British music film ṭha a tihzual pasarihte hi a tarlang a ni.

British rock band Queen frontman Freddie Mercury biopic hi kum 2018-a tihchhuah a nih khan a hit hle a, Bryan Singer-a film hi film lam tuipuitute chuan kan en fur tawh hlawmin a rinawm.

He film hi a hlawhtling hle a, award pawh a dawng hnem a, Freddy Mercury role play-tu Rami Malek pawhin fak a hlawh zui hle. Queen band indin dan aṭanga kum 1985-a Wembley Stadium-a  Live Aid-a an perform thleng tarlan niin, he film en tawhte hi chuan Freddy Mercury nun khawngaihthlak zia an hmu ngei ang.

Sum pawh a hailut hnem a, film siamna budget hi $mtd 50–55 a nih laiin khawvel puma a sum lakluh zawng zawng hi $mtd 903.7 lai a ni tawh. A hlawhtling tih loh rual a ni lo a, Queen fan-te lunglenna kaithotu film hi   'contactmusic.com' in pakhatnaa an dah pawh hi a awm hle a ni.

Kum 1970 chhoa English post-punk band Joy Division singer  Ian Curtis chanchin tarlanna film Control hi 'contactmusic.com' chuan an dah sang hle a, Bohemian Rhapsody dawt chiaha British music film ṭha berah an ngai.

He film-ah hian Sam Riley chu Ian Curtis lemah a chang a, Ian leh a nupui Deborah Curtis-te chanchin tarlanna a ni ber a, kum 1973 leh 1980 inkara vela an hun hman dan pholanna film a ni.

Ian hi kum 1980 khan kum 23 mi chauh niin a vanglai takin a thi a, a sulhnu erawhin ngaihhlutu a ngah hle thung.

Kum 2002-a tihchhuah British comedy-drama biopic film 24 Hour Party People chu pathumna niin, he film hi kum 1976 leh 1992 inkara Manchester-a music community chanchin tarlanna film a ni.  Factory Records leh a chhehvel tarlanna film a ni ber.

Palina chu A Hard Day's Night niin, he film hi kum 1964-a tihchhuah daih tawh kha a ni. Richard Lester siam niin  English rock legend The Beatles (John Lennon, Paul McCartney, George Harrison, leh Ringo Starr)-te channa a ni a, hei hi a tihlutu tak pawh a ni.

Tlangzarh a nih aṭanga kum 40 lai a liam tawh hnuah Time magazine chuan  100 all-time great films a thlanchhuahah a la telh hial a ni. The Beatles fan tan chuan he film hi ngaihven ran chi a ni ngei ang.

Pangana Sing Street hi chu biopic lam a ni lo a, kum 2016-a tihchhuah kha niin kum 1980 chho vela thil thleng anga chan a ni. Mipa naupang pakhatin music hmanga tleirawl pakhat rilru hneh a tum dan a ni a, tleirawl film lam hawi a ni mah a, sum pawh $mtd 13.6 lai a lalut thei a ni.

Nikuma tlangzarh Elton John biopic Rocketman chu parukna a ni a, Bohemian Rhapsody ang em emin hlawhtling lo mah se sum a hailut hnem hle. 

Kum 2019-a tihchhuah tho Yesterday chu pasarihna niin John Lennon leh Paul McCartney-te hla 'Yesterday' aṭangin a film hming hi lak a ni nghe nghe. He film-ah hian Ed Sheeran pawh a inlan a ni.

'contactmusic.com' British music film-a lang lo zinga langsar pahnih chu kum 2009-a tihchhuah Nowhere Boy leh 1997-a tihchhuah Spice World-te hi a ni awm e.

Nowhere Boy hi John Lennon-a rawlthar nun tarlanna film, Paul Mc Cartney nen an inhriatna leh The Beatles din chhoh dan tarlanna a ni. Lennon-a farnu (Lennon-a nu fa bik)  Julia Baird biography behchhana siam a ni.

Kum 1997-a tihchhuah Spice World ve thung hi chu Spice Girls-te channa a ni a, musical comedy film niin an lar vanglaia an tihchhuah a ni bawk a, a hunlai chuan a hit hle.