MSSSB Chairman atan MNF Adviser ruat a ni MSU-in party mi dah an duh lo

Mizoram sorkar chuan Mizo­ram Subordinate Services Selection Board (MSSSB) chairman atan Lalrammawia, MSS (Rtd) a ruat. Mizo Students’ Union (MSU) chuan, MSSSB chairman atana political party mi leh sa dah a ni chu ṭhalai leh zirlaite dinhmun ngaihtuahin ṭha an tih loh thu an tarlang. Lalrammawia hi MNF General Headquarters-a adviser ni mek nia thu dawn a ni.

MSSSB chairman atana Lalrammawia, MSS (Rtd) ruat a nih chungchangah hian Mizoram sorkar chuan February 24, 2019 khan hriattirna a tichhuak. MSSSB Chairman hna hi kum thum chhung atan a ni a, kum thum tlin hmaa kum 65-a tlin erawh chuan chairman hna chelh chhunzawm theih a ni lo.

MSU chuan, MSSSB din chungchanga sorkar nen an indawr ṭumin, zirlaite hmakhua ngaihtuahin party induhsakna awm thei zawng zawng lak ata MSSSB chu thlitfim a nih theih nan rawtna an siam thu an tarlang a, "Tuna Chairman atana party mi leh sa dah a ni hi ṭhalaite rilrua hlauhthawnna awm sa chawh thawhna leh Mizo zirlaite aiawha thu thlen zah lohna lian takah kan ngai," an ti.

MSU chuan, MSSSB chair­man atan hian political party-a inhnamhnawihna nei lo mithiam dah leh thuai a nih theih nan theihtawp an chhuah zel dawn thu an tarlang.