Thiem vs Zverev

Theihna nei sang, player ropui dangten an nek chep kara rawn chhawr chhuak pahnih - Dominic Thiem leh Alexander Zverev te chu vawiin chawhnu dar 2:00 hian Australian Open semifinal-ah an intawng dawn.

French Open final khel tawh kum 26 mi Thiem hi tawnhriat ngah zawk a ni a, kum 22 mi Zverev erawh major tournament-a a thlen san ber ṭum a ni thung; an pahnih an intawn tawhnaah Austrian tlangval hian vawi ruk hnehna chang tawhin ṭum hnih a tlawm thung.

World number 1 Rafael Nadal hneha semifinal lut thei Thiem chuan, "Tun hmain kan inkhel hnem tawh, ATP Finals leh French Open quarterfinal te kha ka la hre reng, inelna nuam leh hlimawm kan nei ṭhin. Australian Open semifinal a ngaihnawm leh dawn.

"Player ṭha pahnihte Grand Slam semifinal-ah an intawng a nih chuan danglamna siamtu chu thil tlemte a ni ṭhin, chulai taka che fuh zawk nih chu ka tum ang," tiin player pahnih dinhmun a inthlau lo hle tih a sawi.

ATP Finals 2018 champion Zverev-a'n an intawn hnuhnung pahnihah Thiem a ngam lo, tun ṭumah erawh a che fuh zawk nih ngei a tum. German tlangval chuan, "Tu emaw zawk chuan final kan lut dawn, chumi hma erawh chuan hna thawh tur a la tam hle.

"Madrid, Rome leh Masters ṭhenkhat aiin tum ṭum Australian Open hi ka khel fuh zawk, a nihna takah chuan beisei nei sang lo tak chungin Melbourne Park hi ka pan," tiin hard court inelna lianah a beisei aia ṭhain a kal mek thu a sawi.

Seeded pasarihna Zverev hian quarterfinal-ah Grand Slam vawi thum champion tawh Stan Wawrinka a hneh, Swiss star nen an inkhelh ṭum hian set hmasa ber a hloh - Stan nen an intawn hma zawng hi chuan set hloh loin a kaltluang. Thiem erawhin match nga a khelh aṭangin set li a hloh tawh thung; thahrui a hmang hnem tawh zawk.