LUAH LOH RUNAH KA CHENG

A tum thiam kuta a awm chuan violin hlui chhe tak pawhin rimawi ropui tak a chhuah thei a, nula hmelṭha leh pian nalh ber pawh hian a mawina hmu thiam lotu rams lakah lungmawl lakah chuan duhawmna leh ngaihnobeina a nei ik chuang hauh lo. thil reng reng hi a thlirtu mit leh ngaihtuahna a zirin a mawiin a ropui mai a ni.

In ram ding satliah mai mai hian mi pangngai mitah ropuina leh mawina a nei lo va, thu ropui puan chhuah tur eng mah a nei lo va, a lakah zir tur a awm hek lo. Mahse, Zirsangzela Hnamte kha mi pangngai a ni lo va, mi a ang tlat lo! Mi a an loh avang tak khan in ram satliah mai mai khan a ngaihtuahna a hruai a, suangtuahna ramah chengin hla ropui tak a din chhuak tlat nia! Hmun mawi leh ropui tak tak te, nula hmelṭha leh nalh tak takte avangin hla ropui tak tak a piang fo va, mahse, Zirsangzela chuan in ram chhe te avangin hla ropui tak a phuah chhuak tlat thung.

Tu pawhin kawng kama in ram ding satliah mai mai te hi chu kan hmuin kan tlan pel fo tawhin a rinawm a, hla ropui tak phuah chhuah nana hman chu sawi loh, ngaihtuah pawh kan ngaihtuah zui ngai lemin a rinawm loh. Mahse, thil ho te anga lang aṭang hian thil ropui tak a lo indin chhuak ṭhin tih hi thu dik a nihzia Zirsangzela hian rawn nem nghetin, in chhe te pakhat avangin Zofate hi hla ropui tak mai min chhawp chhuahsak a. Chu hla, 'Luah loh run' chu chen nan hmangin, vawi tam tak ka ngaihtuahna hian a luah tawh a, a la luah leh fo ṭhin ang.

He hla phuah chhuak thei tura lunglennain Zirsangzela a zem nat turzia te hi chu keini ang duang tan chuan zuk suangtuahpui phak ngam chi a ni lo. Lunglenna tur hi a zawng hrim hrim a, he in ram a hmuh hian inhrikthlak nan a hmang ta mai nge ni a, he in ram chul rep mai hian lungleng lo thei lo dinhmunah a hnuk lut ta zawk tih pawh hi chhut fe tham a awm a; a chhanna erawh chiang taka hriat aiin suangtuahnaa rin thu nena ngaihtuah zui veng veng ṭhin hi ka thlang zawk.

Kha in ram kha mitthla-in ka han hmu ve ṭhin a; hmanlai Mizopa in dik tak, a chung di, a bang pawh bawhtah ngat, luhkapui leh sumhmun leh thil dang zawng zawng pawh a nih dan tur ang thlapa siam a nih ka ring. A thar lai chuan ama tawkah mawi pawh a mawi ve thawkhat ang. Mahse, tunah chuan sazu leh chaichimte bakin tual chai nan leh tawm hul nan an hmang duh tawh lo. Enkawltu leh tifaitu pawh a nei tawh lo va, a bawh buaitu hrui zam leh hnim hnawk han sam faisaktu pawh nei tawh lovin thli chhia-in a chhem darh hun nghakin a ding tlawk tlawk ringawt mai a ni. A luah lumtu awm ve chhunte lah chuan thawm ṭhat lam aiin tihchhiat belh zel chu an thiam tawk a nih miau avangin a remchang lai apiang an rek a, vung an chhuah ten tun mai bawk si. In nuam tawk tak ni ve ṭhin kha thlam ram aiin a chan a ṭha tawh bik chuang lo.

Chu in ram chul rep mai chu Zirsangzela khan a han hmu ve a, chu 'luah loh run' chuan a thinlung a luah lo thei lo. Tichuan, chu in ram chhe te chu a hun liam tawh lamah khan suangtuahnain a han thlawh kirpui ta a:

Hmanah chuan hlim te'n laichhuata'n maw,

Siali hel vala chham ang zal e;

Tualvawk rawl so ri bawhar khuang nen,

Chiar nghin nghian run kha a chul zo ta.

Sawn ni awm thei lo run in khartung,

Senmei dawhtling pawh rial ang dai e!

tih hi chu luah loh run dinhmun dik tak chu a ni. Hmanah chuan chu luah loh r<n chu chutiang em ema riang chu a ni ngai bik lo va, hlim nui ri te pawh a lo thangkhawk ve rawih rawih tawh ṭhin. La kai malh malh chung an nula khan inleng tlangvalho a lo dawngsawng a, chumi pah chuan vawkchaw chhuan lai chu a han chawk ri leh barh barh ṭhin bawk a. A rimtu tlangvalte lah chu a ṭhen tungchaw nghengin an ṭhu thluang a, an titi zuah zuah a, ṭhenkhat lah chu chhuatlaiah an thal pheng phung mai bawk a. Fiamthu te thawhin an nui tlawrh tlawrh a, titi khaihlak chang, an ngawih ṭhiap laia vawkchaw lo so ri berh berh leh leng ṭhutmuan ar lo khuang thliai thliai ṭhin te chu an tan chuan nunkhaw tinuamtu leh tifamkimtu a ni ve lo thei lo ang.

Tlangvalhovin chhun lama an ramchhuah chanchin te an sawi laih laih a, an nula rimin an thing phurhna lama an thil tawn a lo sawi ve siam siam bawk a, naupangho lah chuan chhun lama an nunchan zirna chanchin eng eng emaw an lo rikpui ve hlut reng bawk nen. Chutiang chuan chu in chu hmanah chuan 'chiar nghin nghian run' tia koh inthlahrunawm hauh lo turin nui ri leh rimawi dangin a chen chilh a, hlimnain thla a zarna hmun, in ngainatawm tak a ni ve ṭhin.

Mahse, tuna a dinhmun erawh chu chau tak a lo ni ta. A hmel enin ngainatawmna a nei tawh lo va, nui ri leh hlim rawl han chhuah chi ziazang a ni tawh lo - Luah loh run a ni tawh. Khua a lo ngui a, zan hun a lo thleng a, tlangval nula rim turte chuan chu in ram ding ngawi rneg chu an kal pel zung zung a, mit sir pawhin an melh peih lo. A chhungah chuan eng nge awm tia hriat tum pawhin an thlithlai chhin ngai reng reng tih hriat takin a kawngkhar te chu a ṭhing ṭhip ṭhiap tawh a, han lawi luhna chi hmel a pu tawh lo.

Hmana vawkchaw bel lianpui pui an vil so vut vut ṭhinna tapchhak zawl te lah chu sazu leh rannung dangte pawhin an belh ṭhat peih loh khawpa lumna nei lo, kum eng emaw zat mei rim nam tawh lo tih hriat tak hian a dai ri riai tawh a; ngainatawmna reng reng a nei tawh lo.

Chu tapchhak zawla lo inchhaih nui rawih rawih a, vanglai hun hlimawm tak lo hmang ve tawh ṭhinte khan chu in chu rawn ngai ve ṭhin tak ang maw! Chu tapchhak zawl dai dek tawhah chuan nula leh tlangval inhmangaih tak takte pawhin zawlthu te pawh an lo thlung ve tawh maithei a, chatuan thu nung infah tawn nan te pawh an lo hmang ve tawh ṭhin maithei asin. Chutiang khawpa hmun hlu leh hmun ngainatawm ni ṭhin chu eng vanga r<n ram chantir ta mai nge maw an nih le? Chu tak chu Zirsangzela thinlunga zawhna lo lut pawh a  ni. Eng vang kher kherin chuti taka riang tura chu in chu kalsan a nih? Eng vang tehlulin nge chuti taka chan chhe tur chuan rauhsan a nih? Nge, kha in lo luah lum ve ṭhintute kha thihna kut vawt chuan a huang chhungah a lo seng lut ve ta zawk em ni?

In ram pakhat vanga hetiang ngaihtuahna zawng zawng min neihtirtu, lunglenna leh khawhar ruk veng vengna rauva min chentirtu leh, luah loh r<n thinlunga min luahtir tlattu Zirsangzela hi eng angin nge i ngaih ve tih chu i thu thu a ni a, ka ngaih danah chuan he pa lunglenna rau chan hi a sang lutuk a, mi pangngai tan chuan hriatthiam harsa khawp a ni.

A chang tawp ber phei hi chuan lung a tileng satliah ngawt tawh lo va, hnuk a tiulh hial thei. He in ram dinhmun hi chiang tawk fe-in a han tar lang te te a, hlimna leh lawmna lam thil reng rengin a hnuchhawn tawh, a chhunga hlim taka lo khawsa ve ṭhinte pawhin hriat loh ram lama an liamsan hnu, dinhmun chhe bera ding mek kha ama nun nen a han hmehbel chho ta a, a hla ropuina ril tak mai a hmawra a rawn bawk nalh dan em em hi chu a ti lutuk mah mah em ni chu aw tih rum rum theih a ni.

Ama dinhmun sawi a ngai tawh lo; kha luah loh r<n khan a dinhmun dik tak, a chan chhiatzia leh ṭhenrual ṭha zawng zawng ngai leh thlahlela a rumna te kha a rawn pho lang vek a, ama nun dik tak tar lan nana kha in ram tlawm te mai a rawn hmang thiam kha thil namai a ni lo. Zirsangzela 'Luah loh run' zet hi zawng, a ropuizia leh a thukzia sawi tur hian kei em hi chu ka tling ngang lo a ni.