Israel-in Gaza firfiakte a bei let
Israel indo thlawhtheihnate chuan Nilaini zanah khan Gaza strip-a firfiakte an kap. Gaza firfiakte hian a hmain Israel hi rocket hmangin an kap a, hemi vang hian Israel indo thlawhtheihna eng emaw zat chuan Gaza Strip hi an kap let a ni.
Thi leh hliam an awm leh awm loh tarlan ni lo mah se Gaza Strip chhim leh hmar lama hmun pahnih chu an kap fuh thung.
Israel-in Gaza an kah hma lawk hian Hamas firfiakte rorelna hmun aṭang hian Israel hi rocket hmangin an bei a, mahse engmah tihchhiat lian tham an neih loh bakah thi leh hliam pawh an awm lo niin Israel media-te chuan an tarlang. Israel lama rocket kahchhuah chungchangah hian eng pawl mahin mawh an phur thu an la sawi lo a, mahse Israel lam hian Hamas-te hi mawhphurtuah an puh thung a ni.
Israel drone hmanga missile kahchhuah pakhat chuan Palestinian activist ṭhenkhat, Gaza Strip hmarlam aṭanga arson balloon chhuah tumtute awmna hmun chu a kap fuh nia sawi a ni a, mahse thi leh hliam an awm lo niin an sawi.
Gaza Strip aṭanga arson balloon chhuah a nih ṭhin avang hian kartirah pawh khan Israel jet fighter-te chuan beihpui an lo thlak tawh bawk a ni.
March 2018-a Israel-te duh lohna Great March of Return buatsaih a nih hnu aṭang khan kar tin Palestinian tam tak chuan Israel duh lohna kawngzawh hi an nei ṭhin a, puak thei thil keng balloon leh arson balloon-te hi an chhuah fo bawk. Hemi vang hian Israel ram tam tak chu a kang tawh niin Israel lam hian an sawi fo tawh a ni.