CAB dodal hun laia Assam rama dawrkaite kha an va fakawm em!

2019 December thlaa CAB (tuna CAA lo ni ta) avanga Assam rama nasa taka dodalna leh duh lohna kalpui a nih lai khan, Bandh mai ni lovin, curfew thlenga puan a ni. Inkalpawhna awm zawng zawng dan pin niin kawng dan nan kawng kham zawngin thing te an kit a, mipui pungkhawmten kawngah a remchang chang halin kawng an dang a, hmun ṭhen­khatah phei chuan rel kawng te pawh tih chhiat a ni. Chuvang chuan ei leh in lam in lamkhawm tur pawhin dawr inhawng ngam an awm lo. 

Ni engemaw zat hnuah darkar hnih khat atan dawr hawn zawk theih a ni a, chutah chuan alawm ringlo kan lo tih zawkte hi Mizoram sumdawng tam takte hian kan tluk lo mai awm mang e ka tih tak. Dawrah mamawh lam khawm turin a tlarin kan intlar a, Mizopa rilṭam rilruah chuan sum neih ang anga a tam thei ang ber lak a ni. 

Mahse ringlo zawkte chuan tam deuh kan lei te chuan midangin lei tur an nei ve nang an ti then mai a, kan zak rum rum mai asin, chu chauh chu a la ni hlei nem. Kan lei hun a lo thleng ve ta. Zoram lam anga an tih to deuh vak ka lo rilruk lai khan a man pangngai thovin kan va lei a, a mak ka ti hle. Chutah sum neih ang anga a tam thei ang ber lei ka tum laiin, "Ka pu, hei chu 1kg bak kan pe thei lo, hei chu 1ltr bak kan pe thei lo, Artui hi chu a platein kan pe thei lo 5 te te in kan pe. etc. tam deuh deuha kan pek chuan midangin an chang ve lo palh ang," an ti then mai. Ka ngaihtuahna a kal thui hle mai. 

Zoram lamah ni ta ang se thil man uchuak takin a to phah ngei awm si a, kan stock sa reng reng, a tlawma kan lak ngei ngei pawh a boruakin a zir vanga ti to duh pawl an awm ang a, a rang thei ang bera hralh zo nghal pak pak duh pawl an awm ngei ang. Kan zavai chuan a ni lo maithei. Mipui, dawrtute zah miah lo an awm leh ngei bawk ang, hman deuha chi to thut dan aṭang khan a chiang thawkhat viau e. 

Ringlo kan tih zawk te hi keini ringtu inti zawkte hian kawng tam takah tluk lohna kan lo va ngah em! Kan hmuhsit em em vaiho tih mai pawh ni lo, vaichheho kan han tih deuh kher hote hian an pumpui chauh ni lovin customer te pawh an lo hmangaih hle mai tih a chiang khawpin ka hria. Tin, anmahni dawrtute pawh an rilru a zauvin ringtu inti tam takte ai hian an rilru a lo ṭha a nih hi tih tur an awm nuk mai. Kristian, rawngbawltu kei ngei pawh hian ringlote nunah hian entawn tur tam tak ka hmu fo mai.