Guwahati-a Filmfare Awards sem duh lo

Assam khawpui, Guwahati-a February 15-a  65th Filmfare Awards 2020 ceremony neih tur chu Assam-a pawl hrang hrangten an duh loh thu an sawi a, an zingah Assam artiste-te pawh an tel. 

Assam filmmaker Jahnu Barua chuan, magazine pakhatin award semna  hun a buatsaih tura state sorkarin sum tam tham tak a invest chu a duh lo tih sawiin, Assam state chu CAA avanga an buai mek laia hetiang thil sorkarin a lo buaipui chu an hrethiam lo tih a sawi. 

Actress Zerifa Wahid pawhin hetianga sum tam tak sensona tur thil lo buaipui chu a hun lo nia a ngaih thu sawiin, he award buaipuitute hi state tam takin an lo hnar tawh a, hei vang hian Guwahati-ah rawn nghah an tum ta mai a ni, a ti. He award buatsaihtu, Filmfare magazine pawh hi hmarchhak bialah a lar tawh lo a, hetihlai an award semna lo buaipuina tura sum tam tak lo sensak chu a ṭul lo tih a sawi bawk. 

Actor Ravi Sharma chuan Guwahati-a Film­fare Awards sem hi an state-in eng kawng mahin a hlawkpui dawn lo a, sum tam tak an senral phah zawk dawn. Sorkar chuan he festival neih tur atana a sum sen turte chu paper mill khar tawhte tuaithar nan te, harsatna tawk mekte chhung­kuate dinhmun chawi­kanna tur atante hmang zawk se a duh thu a sawi. 

65th Filmfare Awards huaihawt tur hian Assam sorkar chuan Times Group chu MoU a ziahpui a ni. He hun hi event lian leh ropui tham taka buatsaih a tum a, Bollywood star rualte an inlan dawn a ni.