Jamia zirlai anti-CAA rally neite silaiin kap

South Delhi-a Jamia Millia Islamia University zirlai, Citi­zenship Amendment Act (CAA) leh National Register of Citizens (NRC) duh lohna lan­tira kawngzawhte chu nimin khan mi pakhatin silaiin a kap a, zirlai pakhatin hliam a tuar. 

Silai hmetpuaktu hi kum 31 mi, Gopal a ni a, police-ten man nghalin thu zawhfiah turin an hreng zui.

Gopal hian zirlai kawng­zawhte chu silaia tinin, "Jai Shri Ram" tiin a au a, hemi hnu hian nawrh huaihawtte chu India rama an la awm zui zel duh a nih chuan 'Vande Mantaram' tih sawirual tura tiin a silai ken chu a hmetpuak zui nghal a ni.  Silai mu hian zirlai pakhat, Shadab chu a banah fuhin, Jamia Nagar-a Holy Family hospital-ah hruai a ni a, a hnuah AIIMS-ah sawn leh a ni. 

Jamia zirlaite hian CAA leh NRC duh lohna lantirin university campus aṭangin Jantar Mantar thleng kawng an zawh a ni. Silai hmetpuaktu hian kawngzawhte hi tibuaia vau zam a tum a, hetiang thil a tih lai hian police-te chuan ngawi rengin an lo thlir niin zirlaite chuan an sawi. 

Kawngzawhnaa pawi­khawih­na a thlen hnu hian metro station pathum - Jama Masjid, ITO leh Delhi Gate entry leh exit gate-te chu khar nghal a ni.