France-in an nuclear power plant hluihlawn

Environmentalist leh nuclear ralthuam tihtlem a nih theih nana hmala tute ngenna angin, France chuan an rama nuclear power plant Électricité de France (EDF) zinga hlui ber chu kar liam ta Inrinni zing dar 2 khan a hluihlawn ta. 

France-in kum 43 lai a lo hman tawh, EDF hlui ber hi Germany nen an inrina bula Fessenheim khuaa awm a ni a, kar liam ta Inrinni khan EDF-a nuclear reactor pakhat chu anni huna zinglam dar 2-a hluihlawn a ni ta a ni. Reactor pakhat zawk hi kumin June thlaah tihtawp leh tum a ni bawk.

He nuclear power plant hi a hlui tawh avangin vawi tam tak environmentalist leh nuclear ralthuam tihtlem a nih theih nana hmala tute chuan titawp turin an lo ngen fo tawh a, mahse tihtawp a nih chuan hna nei lo an awm phah dawn avang leh a chhehvela economy a nghawng theih dawn avanga tihtawp duh lo pawl an awm hrang bawk a ni.

Kum 1977 aṭanga France ramin a lo hman tawh, he nuclear plant kaltlang hian electric pek chhuah niin, tihtawp a nih chuan he hmuna thawk mi 2,000 vel chu hna chungchangah a nghawng thei dawn a ni. Tihtawp a nih hma kar liam ta Zirtawpni tlai khan nuclear plant awmna khua, Fessenheim-ah hian titawp duh loh pawl an pungkhawm a, vanneih thlak takin buaina lian tham erawh a chhuak lo.