Tripura : Dan loa rubber chingtute hrem dawn

Tripura sorkar chuan an state-a dan loa rubber chingtute chu hrem an ni dawn tih a sawi. 

Tripura revenue minister Narendra Chandra Debbarma chuan phalna nei loin ram, acre 21,019 chuang zeta zauah rubber hi an ching tih sawiin, district magistrate leh sub-divisional magistrate-te hnenah sorkar ramte heng miten sorkar ram an hmante chu laksak turin hriattir an ni, a ti. 

Minister chuan sorkar hmasa, Left Front sorkar khan heng ramah hian phalna engmah pechhuak loin rubber an chin hi a lo phalsak a ni, a ti. Mahse BJP kaihhruai sorkar chuan dik lo taka sorkar ram hman a nih 

ṭhinte venna turin Tripura Land Records and Land Reforms Act, 1960 siamṭhat a tum tih a sawi bawk. Debbarma chuan kum tam tak chhung chu sorkar ramah chhungkaw 51,635 vel zet an lo cheng tawh tih a sawi bawk.

Tripura hi India rama rubber tharchhuak tam state pahnihna niin Kerala chiah a pha lo a ni. 

Tripura-ah hian ram hectare 85,000 a zau rubber chinna hmun awmin, kum khatah rubber ton 68,000 zet a tharchhuak ṭhin. Rubber aṭanga kum khatah a sum hmuhchhuah hi cheng vaibel­chhe 700 vel a tling a ni.