Kawng kan nei ṭha ṭan ta

Mizoram hmun hrang hrangah Cong­ress sorkar tawp lam khan kawng a chhe em em vek a, a awmzia chu fur a nasat em vang leh a enkawltute inthlahdah vang a ni ber. Khati khawpa kawngpui chhia kha MNF a sorkar meuh chuan a hnum ta hen hun mai. 

Mipui hian kawng ṭha kan duh a, lirthei neitute phei chuan kawnga an lirthei an kaltir man hi an chawi ṭawk ṭawk a, chutih laiin sorkarin kawng ṭha min pe lo a. Congress sorkar lai phei kha chuan maxicab hnungah nen lam kawng ṭha duhna poster tarte pawh a awm kha. khati khawpa kawng chhia min hnutchhiahtu Congress sorkar khan in enlet nan hmang ve se. 

Tunah MNF kum khat a sorkar a, a sorkar tirh phat aṭangin Chisf Minister Pu Zoramthanga'n kawng chhia a vei a, a enkawltu PWD hotu ber (Engineer-in-Chief) Pu K. Sawmvela'n E-in-C charge a la a, a ni pawh mipui hmakhawngai mi, mahni hnaa inpe tawp a lo ni bawk nen tunah chuan kawng chhe lutuk a awm ta meuh lo. Khawi khaw kawng emaw laih lai mekte a nih ngawt loh chuan. 

Congress sorkar kha a pumhlum chuan kawng chungchangah puh fai vek theih an ni bik lo ang. An hun hnuhnung lamah phei kha chuan sum awm loh chu thuhran, kawng siamṭha turin fur pui a rei em a, chetlak ngaihna a awm bik lo. Mahse ngaihsak tak tak se chuan khati lutuka chhe rei tur chu a ni lo. 

Pu Zoramthanga hruai MNF sorkar a piang a, kawngpui chhuat rualrem lo hmun tam tak an han khawih nghalte kha a lawmawm. Lirthei neitute chang lo, mipui zawng zawngin hma­sawnna kan hmuh theih chu kawngpui ṭha a ni. PWD lam an han che tak tak a, khawi khaw panna mah kawng chhe lutuk a awm ta lo. Chu mai a ni lo, Aizawl khawpui chhung kawngpui leh a tepen thlengin rulngan pa ang zarin a hnum ta hlurh mai hi PWD chungah pawh lawmthu awm teh se. 

State hmasawnna hmuh theih hmasa ber chu kawngpui ṭha a ni. Aizawl - Lunglei world bank kawng pawh tunah chuan kal a nuam tawh hle. Tlawng leh Pukpui inkar pawh kawngpui khar meuha an han luan thar leh chu hmasawnna ropui tak a ni. Hei bakah hian PWD chuan khaw kar kawng hmun hrang hrangah a chei ṭha mek a, sum pawh heng kawng cheiṭhat nan hian dah a ni. Chung sum hmang chuan PWD circle leh division aṭanga sub-division enkawltute'n chak takin hma an la mek a ni. 

Sawi lan loh theih loh chu tunhma chuan kawng enkawltu engineer-te'n dawhkan aṭang hna an thawk a, kawng siamtu tak tak chu labour ho an ni, tiin kan sawi ṭhin. Tunah chuan engineer-te an phu ta suau suau a, kawng a ṭha tawlh tawlh tate hian engineer ṭhu mai mai anga kan ngaihte chu ṭanrualna a siam hle a ni.