Buaipui tham leiṭha

Assembly Budget Session neih mekah Agriculture minister chuan, leiṭha (fertilizer) chu Guwahati aṭangin an la a, loneitute hnen thleng loin Myanmar-ah a lut niin a lang, tih a pawm a, minister a nih hlima dilna lut hnem ber chu chemical fertilizer dealer nih dilna a nih thu a sawi. Eptu lam leader chuan chemical fertilizer-te chu dealer-in man tlawm zawka laa an district-a hralh tur a nih laiin sum siamna atan Myanmar-ah an hralh nasa tih a sawi lang a, Chief Minister pawhin hei hi dan an tum tur thu a sawi. 

Tun hnaia Mizoram leh Myanmar insumdawn tawnna lian tak chu leiṭha hi a ni. Heng leiṭhate hi state pawn aṭangin Mizoramah phurh luh a ni a, Mizoram kaltlangin Myanmar-ah phurh luh a ni. He sumdawnna hi dan ang taka kalpui a ni lo tih hre reng chungin sorkar hian a haider lui niin a lang a, kan ram chhunga hetiang thil ualau taka kalpui a ni hi a ngaimawhawm hle. 

Sorkar hian he sumdawnna tihtawp hi a tum tak tak a nih chuan thil harsa tak niin a lang lo a, langsar leh ualau taka kawngpuia phurh a nih vang hian a dang duhtu tan chuan dan theih a ni ngei ang. Mi ṭhenkhat phei chuan kan kawng­pui rap chhetu motor liante hi dan kalha sumdawnna kalpuitute an nih thu an sawi lang hial ṭhin a, chuti chunga man loha an chhuak thei zel hi thil mak tak a ni. 

Mizorama rorelna in sang berah leiṭha tawlh a nih dan sawi chhuah a ni a, Agriculture minister leh Chief Minister ngei pawhin an ngaimawh niin a lang a, session hi han zo se a taka bawhzuiin dan loa leiṭhaa sumdawnna hi tihtawp ni ngei rawh se.