KSU-in ILP phuta nawrh huaihawt lehah vau

Meghalaya zirlai pawl, Khasi Students' Union chuan an state-a Inner Line Permit (ILP) system hman an phut chungchangah, rei tak dawhthei taka an nghah hnuah nawrh huaihawt leh a hun tawh niin an sawi. 

KSU president Lambok Marngar chuan, "ILP chung­changa meeting neih chu a hlawhtling lo a ni. Inbiakna ṭha tak a awm kan beisei laiin, sorkar laipui chuan enfiah a la nih tur thu a la sawi chauh a ni," a ti. 

Marngar chuan Manipur-in ILP hman phalna a hmuh nghal theih lai a, Meghalaya-a ILP hman tur chungchang zirchian leh a la ngaihna chhan chu a hrethiam lo tih a sawi. "Hei hi state mipuite zah lohna a ni. Meghalaya mipuite chuan an thil phut hi hun rei tak tihkhawtlaisak an ni tawh a ni," tiin a sawi. 

"Kan dawhtheihna hi chintawk a nei tawh a, nawrh hmanga kan nawr zui a ngai leh ta a ni. Thil eng pawh lo thleng se, a mawhphurtu chu state sorkar leh sorkar laipui an ni ang," tiin Marngar chuan a sawi zui. 

Meghalaya chief mi­nister Conrad K Sangma kaihhruaiin Meghalaya palaite chuan kar liam ta Ningani khan union home minister Amit Shah an hmu a, an state-a ILP system hmantir tawh turin an ngen a ni. Mahse an inbiaknaah hi a hma ang bawkin a la hlawhtling thei lo a, Amit Shah hian zirchian a nih tur thu a lo hrilh leh a ni. 

Marngar chuan eng ang chen nge sorkar laipui chuan ILP hman tir turin hun a mamawh dawn tih a hriat loh a, mahse an pawl chu an dinnaah nghet taka dingin, ILP hman a nih theih nan an nawr chhunzawm zel dawn tih a sawi.