Covid-19 Ram 160 hruaituten China hmalakna an thlawp
Ram 160 hruaitute leh international organization 30 hruaitute chuan China-in Covid-19 leng mek avanga harsatna a tawh mekah an lainat thu an sawi a, hemi rual hian hri leng do letna kawnga China sorkar hmalakna chu an thlawp thu an sawi.
Chinese Mission to UN-a hotu, Chen Zu chuan Ningani khan Geneva-ah press conference neiin, China-in hri leng mek ven leh khuahkhirh tura theihtawp a chhuahna chuan an ram mipuite tam tak nunna chhanhimin, ram dangte tan pawh lo inbuatsaihna hun a pek phah a ni, a ti.
Zu chuan, "Hri leng mek veng leh dang tura hmalakna chungchangah WHO thurawn pek anga kan kal zel a pawimawh a ni," tiin a sawi. China chuan he hri leng mek hi a rang thei anga hneh a nih theihna turin WHO leh ramdangte chu a thawhpui zel dawn tih a sawi.
China-WHO Joint Expert Mission chuan China ramah hna thawk mekin, China chauh ni lo ram dang zawng zawng tan pawh Covid-19 leng mek laka inven leh a darh zel tur khuahkhirhna dan turah thurawn an siam thuai dawn a ni, a ti. Tunah chuan a vei tawhte enkawl dam leh chu ngaih pawimawh hmasak a nih thu a sawi bawk.
Covid-19 hmuhchhuah ṭanna leh a hluarna ber, Hubei province-ah chuan medical team 200 chuang leh medical personnel 30,000 ten hri kaite enkawl hna an thawk mek tih Zu chuan a sawi.
National Health Commission of China pawhin hri leng mek chu khuahkhirh a ni ṭan nia sawiin, an rama province 34 zinga 14-ah he hri kai thar report a awm tawh lo tih nimin khan a sawi. Nimin thleng khan China rama Covid-19 vanga thi zat hi mi 2,247 an tling tawh a, a kai zat finfiah tawh hi mi 76,716 an ni bawk.
Mi dang 120,302 chu enfiah mek an la ni bawk a ni.