City bus thlak a hun ta e

Aizawl khawpuia mihring phur tam ber chu Aizawl City Bus-te hi an ni a, public transport-ah chuan a chuan man a tlawm ber vangin mirethei ber berte'n ka chhawr ber an ni a; kan ṭangkaipui ber a ni bawk. 

Mahse kan city bus-te hi a ṭawng em em tawh hlawm a, bus 10 vel bak hi chu hluihlawn chakawm tak tak vek an ni. Mihring an phur tam ṭhin si a, an motor khawl a hlui tawh hlawm si. Hetianga kan hman zel chuan chhiatna nasa zawk a thlen a hlauhawm takzet tawh a ni. 

Bus tam zawk chu MZ01... te, MZ01A/ B/ C/ D/ E te an ni tawh hlawm a, an rei tawhin a rim si a, thlak thar vek theih nise a va ṭha dawn em. 

City bus tam zawk hian pollution control board aṭang certificate an nei vekin a rinawm a, mahse a tak takah chuan bus tam zawk hi chuan pollution certificate nei thei khawpin an fit tawh lo tih a chiang reng mai. City bus tam zawk hi Chaltlang kawng chho angahte han zui i la, an tlan muangin a motor cylencer khu a nasa em em ṭhin a, an hnunga tlan a hrehawm ṭhin hle. Han lehpel dawn ila kawngin a zir si lo a, bus khu kan hip tluan parh zel mai a ni. 

Bus driver-te hi a neitute'n an khuah­khirh ṭha viau a, Association ang phei chuan City Bus Owners' Association bakah inkhuahkhirh ṭha Association dang an awm meuh awm lo e. Driver emaw con­ductor emaw passen­ger laka che mawi lo leh city bus hmel tibal lakah pawh hremna an inpe nasa hle a, an hruaitu tupawh an bus enkawltute lakah action lak ngai se an la hmiah zelte hian he pawl inkaihhruaina a ṭhatzia a lang awm e.

Chutihrual chuan kan city bus-te hi hei aia te hian thlak vek theih nise kan kawngpui tan pawh a hahdam ngei ang. Bus driver ṭhenkhat phei chu an tlai lam boruak a hriat theih fu mai. Inrinni tlai angah phei chuan bus condition ngaihtuah loa tlan ta vuk vuk hmuh tur an awm fo. 

Heng hi kan traffic police-te hian check ṭhin se, mipui him nan a ṭangkai viau ang. Zu an in leh in loh test-na khawl nen han inchawp se an inthlahdah ngam lo deuh ngeiin a rinawm. 

Chhiatna nasa zawk a thlen hma ngei hian State Tran­sport Authority leh MVI lam pawh hian ngaihtuahna seng se, politician-te pawh a ṭul chuan inrawlh lo ngam se, official-te'n ṭha an tih ang chu kan sorkar (ministry) pawh hian dal loin zawmpui ve thei se a duhawm hle. State pakhat khawpui ve riang ruangah heti em em maia city bus ṭawng service tam hi a zia lo deuh chu a ni.