Remna hnuaiah hna thawk ila

Mizoram State Day lawmnaa thusawitu Mizoram Governor chuan, mipui tawrhna nasa tak karah ṭanrualna vanga Mizoramin state dinhmun a nei chu lawmawm a tih thu sawiin, "Kan state hlawhtlinna aṭanga lang chiang chu, tunlai khawvel buai takah hian ram mipuite'n an duh a, hruaitute'n tharum thawhna aia remna leh muanna an dah sàn tlat chuan remna tluantling a awm thei a ni," a ti a; remna leh muanna chawi sángin, state intodelh ni tura ṭan lak a ṭul thu leh HIV/AIDS, cancer leh ruihhlo do kawngah sorkar thawhpui a ṭul thu a sawi. 

1986-ah Mizoramah remna leh muanna a thleng a, chumi hnuah chuan harsatna lian tham tawk mang loin he state hi a kal zel a; nimahsela he state ralmuang tak hnuaiah hian hmasawnna a kal chak lo hle tih chu kan hre vek awm e. Kan ṭhenawm state-te hi keini aia ralmuang lo leh harsatna lian zawk hnuaia awm an ni hlawm a, chuti chung chuan kawng hrang hrangah kan state hian a phak lo tih kan hmu ṭheuh si a, kan remna neih hi tun aia hman ṭangkai zawk a hun tawh khawp mai. 

Tuna kan state dinhmun hi state dangte hian rawn thlir se kan remna leh muanna hi an awt lo palh mai ang tih a hlauhawm a, remna hnuaiah state ralmuang taka mipui nuai 20 bawr vel hmasawnpui thei lo ram hruaitu kan nei reng mai hi a vanduaithlak hle tiin a sawi tel theih ang. Chhuang taka kan sawi ṭhin kan rama remna leh muanna hi a ropuiin a chhuanawm ngei a; amaherawhchu chu remna hnuaiah chuan hmasawnna hna a kal chak hleithei si lo hi a buaipuiawm lai chu a ni ang. 

Tunah chuan remna leh muanna kan neihna hun pawh a lo rei ta a, hmasawnna hna kan thawhna kawngah kum 30 chuang zet chu dâltu nei loin hna kan thawk thei a, state dangte tan remna leh muanna hi itawm leh awhawm khawpa kan zawrh theihna tur chu remna hnuaia kan hnathawh hi a ni ang.