Chief Minister-in lei a hawng

Kawnpui West luia lei (bailey bridge) dawh thar chu nimin khan chief minister Zoramthanga'n a hawng. Lei a hawn zawhah Food, Civil Supplies & Consumer Affairs (FCSCA) department-in Bairabi-a oil depot tura an ruahman a enfiah nghal.

Lei hawnnaah Chief Minister chuan, "Buhfai leh bungraw rit tak tak rélin a rawn phurhte lak luh a ni a, heta ṭang hian motor hmanga phurh chhuah leh a ni. Kan ei bél kawngpui ber a ni a, lei hmasa a chhiat avangin kan hlauthâwng a, central sum dila nghah kan zo lo a, kan sum neih ang angin hna kan ṭan a ni," a ti a; lei dawh tura FCSCA Minister leh thawktu dangte hmalakna a fak.

Zoramthanga chuan, Bairabi chu rél hmanga bungraw pawimawh dang lâk luhna tur a nih thu sawiin, "Hei vang hian fûr leh ṭhálah lirtheite bahlah loa an kal theih nan lei ṭha a awm hi a pawimawh," a ti.

Kawnpui West luia lei dawhna atan hian cheng nuai 365 hman a ni. Lei hi ton 70 dâwl zo tur, tipple double re-inforced, extra width (TDR EW 70R)-a duan a ni a; Essen Infrustructure Pvt.Ltd., Kharagpur-in ni 20 chhungin an dawh zo a ni.

Oil depot hmun tur an ennaah FCSCA minister K Lalrinliana chuan, oil depot atan IOC-in a zîm berah ram acre 30-35 vela zau an duh thu leh depot sei zawng pawh metre 900 tal ni tura an duh thu a sawi a, "Hei vang hian Sihhmui rama mi chu a rem lo a, Bairabi-ah ram zau ṭha leh hmun záwl ṭha zawk en a ni," a ti.

Bairabi-a oil depot hmun tura an en chu acre 45-a zau a ni a, a huam chhungah mimal 17 leh sorkar department pathumin ram an nei. Chief Minister chuan, department hotute chu a theih anga chaka bawhzui turin a chah a ni.