COVID-19: Mizoram dinhmun Hripui vei mi 17 hmuh belh a ni

January 4, Thawhṭanni khan Mizoramah Covid-19 vei mi 11 hmuh chhuah an ni a, an zingah natna (symptom) lang mi pakhat leh Mizoram chhunga kái mi pakhat an awm.

Nimin khan Maubawkah hripui vei mi paruk, tualchhunga kái vek hmuh belh leh a ni bawk. Nimin vêk khan hripui laka fihlim tawh mi panga chhuahtir an ni thung.

Covid-19 vei Thawhṭannia hmuh chhuah tharte chu mipa pariat leh hmeichhia pathum an ni a; ZMC laboratory-a hmuh mi pasarih, TrueNAT-PCR hmanga hmuh pahnih leh Rapid Antigen Test (RAT) hmanga hmuh pahnih an ni.

Nimin khan hripui laka fihlim tawh mi panga chu enkawlna hmun aṭangin chhuahtir an ni a; SRH-ZMC leh Lawngtlai CCC aṭangin mi pahnih ve ve leh Aizawla home isolation-a awm mi pakhat an chhuak.

Hetih lai hian, Thawhṭannia Covid-19 positive hmuh thar Maubawk mi pakhatin a hnim hnaih mi 10-te chu nimin khan RAT hmangin swab sample endik a ni a, Covid-19 vei mi paruk hmuh belh a ni.

Maubawk Local Task Force tarlan danin, an vêng mi paruk, Covid-19 positive tih nimina hmuh chhuahte chu mipa leh hmeichhia pathum ve ve an ni a; an zingah naupang kum 10, kum 11 leh tleirawl kum 15 mi pakhat ṭheuh telin, mi dang pathum chu puitling an ni. Covid-19 symptom an neih vanga hmanhmawh thila endikte an nih thu an tarlang.

Nimina Maubawka chhuah mi paruk telin Mizorama Covid-19 vei hmuh chhuah tawh chu mi 4,240 an ni a, mipa 3,113 leh hmeichhia 1,127 an ni. Nimin tlai dar 5 thleng khan damin mi 4,153 (97.95%) chhuahtir an ni tawh a, mi pariat (0.19%) thi tawhin, enkawl mek mi 79 (1.86%) an awm.

January 4, Thawhṭanni khan ZMC laboratory-ah swab sample 390, TrueNAT-PCR hmangin district parukah sample 145 leh RAT hmangin district pasarihah sample 386 endik a ni a, a vaiin sample 921 a ni. Covid-19 vei mi 11 hmuh chhuah chu endik zat aṭangin 1.20% a tling.

Mizoramah swab sample 1,82,272 endik a ni tawh a, chu'ng aṭang chuan Covid-19 positive mi 4,223 hmuh chhuah niin, endik zat aṭangin 2.32% a ni.

Sorkar thuchhuah tarlan danin, ZMC laboratory-a hripui vei hmuh chhuahte chu mipa panga leh hmeichhia pahnih, kum 24-44 inkar, Aizawl district-a sample lâk vek an ni a; tun hnaia state pawn aṭanga rawn lut vek niin, symptom nei an awm lo.

Covid-19 vei hmuh chhuah tawh mi 4,240 zinga mi 2,008 chu Mizoram chhunga kái chhâwng an ni a; mi 2,232 chu Mizoram páwn aṭanga an rawn luh hnua hmuh chhuah an ni thung.

ZMC-a hmuh chhuahte:

Hotel Orchid, Dawrpui - 1: Mipa kum 44, tun hnaia Bihar aṭanga rawn lut, hotel-a khung hran lai, symptom nei lo.

Selesih - 6: Mipa kum 24 pakhat & kum 25 pathum leh hmeichhia kum 25 & 34. Tun hnaia Tripura aṭanga rawn lut mi 5 leh UP aṭanga rawn lut mi 1; College of Veterinary Science & Animal Husbandry, Selesiha awm. Quarantine facility-a awm lai, symptom nei lo vek.

TrueNAT-PCR-a hmuh:

BSF, Lunglei - 2: Mipa kum 27 & 31; 199 Bn BSF sipai, tun hnaia West Bengal aṭanga rawn lut, symptom nei lo ve ve.

RAT hmanga hmuhte:

Maubawk, Aizawl - 1: Hmeichhia kum 27, private hospital-a inentir tura kal, hripui vei tih hmuh chhuah; hri kaina hriat loh, symptom nei.

Vairengte - 1: Mipa kum 27, Luangmual, Aizawl mi, Karimganj aṭanga haw, symptom nei lo.