Vangchhia-a Kawtchhuah Ropui National importance-a puan beisei

INTACH Mizoram Chapter hruaitute chuan, Vangchhe khaw dáia Kawtchhuah Ropui chu Archaeological Survey of India (ASI)-in a humhalh tur, national importance-a puan thuai a nih an beisei thu an sawi.

INTACH Mizoram Chapter hruaitute hian Inrinni khan Aizawl Press Club-ah thuthar thehdarhtute an kawm a; an convener, P Rohmingthanga chuan, Kawtchhuah Ropui chu kum zabi 14 leh 15 vela Mizo pipute sûlhnu nia an ngaih thu sawiin, lungphun (stone monument) 200 vel a awm thu a sawi a; India ram pumpui tana hmun pawimawh, national importance-a puanna turin ASI-in November 28, 2013 khan preliminary notification a tihchhuah thu a sawi a ni.

P Rohmingthanga sawi danin, Kawtchhua Ropui national importance-a puang tura ASI-in preliminary notification a tihchhuahah hian, thla hnih chhungin hnialna a awm chuan thehluh theih a ni a; hnialtu an awm loh chuan national importance-ah puan a ni thei tawh dawn a ni. P Rohmingthanga chuan, Kawtchhuah Ropui chu hnialna a awm an rin loh thu a sawi.

Heng Kawtchhuah Ropui-ah hian lungphun eng emaw zat awmin, chu'ng lungphunte chu ker mawi a ni a; hmanlai lal, pasalṭha indo mi leh indona hmanrua silai, fei, chem, ramsa leh incheina hmanraw lemte ker a ni. National importance-a puan a nih chuan, Mizoram chhunga national importance puan hmasak ber a nih tur thu an sawi.

P Rohmingthanga chuan, Mizorama hnam rohlu tam tak venhim, vawn ṭhat leh siamṭhatte ngawrh takin kalpui zel an tum thu a sawi a; Kawhtchhuah Ropui national importance-a puan a nih thei nana INTACH ṭanpuitu Ministry of Culture, ASI, Mizoram sorkara Art & Culture department, chief secretary, Mizoram MP, Delhi-a Resident Commissioner, Champhai DC, Khawbung BDO leh Vangchhe V/C-te chungah an lawm tak zet tih a sawi bawk.

Zawhna chhangin, INTACH Mizoram Chapter hruaitute chuan, Durtlang kawngpui chho leh khâmte chu Mizoramin natural heritage a neih ṭhat berte zinga mi a nih thu sawiin, humhalh a ṭul thu an sawi a; humhalh a nih theih nan Mizoram sorkarah leh Aizawl Municipal Council-ah ṭan an lak mek thu a sawi.


Share this Post

Login to comment
No Comments