Dolly Parton kutah MusiCares Person of the Year award

American singer ropui Dolly Parton chu MusiCares Person of the Year award hlan a ni a ta. Parton hi music indusrty-a a thawh hlawk avangin he chawimawina hi hlan a ni. 

Dolly Parton pual hian Zirtawpni zan khan Convention Center, Los Angles-ah hun hman a ni a, MusiCares chuan Person of the Year award hi an hlan a ni. MusiCares hi Grammy Award semtu an ni a, award sem tak tak hmain Dolly Parton chawimawina hun hi an buatsaih a ni. 

He hunah hian - Garth Brooks, Brandi Carlile, Miley Cyrus, Shawn Mendes, Kacey Musgraves, Willie Nelson, Katy Perry, Pink leh Chris Stapleton bakah Don Henley te pawh an tel a, lawmpuitu a ngah hle. Garth Brooks leh Miley Cyrus te chuan Dolly Parton an ngaihsan thu leh an lawmpui thu an sawi a, Shawn Mendes leh Katy Perry te pawhin social media lamah Parton an lawmpui thu an tarlang ve bawk. 

Kum 73 mi Dolly Parton chuan, "Chawimawina ropui tak a ni a, ka ngaihlu tak zet a ni. Rimawi khawvela ka sulhnute vanga chawimawi ka ni hi ka inchhuang tak zet a ni," tiin a sawi. Person of the Year award hlan a nih tur thu hi puan lawk a lo ni tawh a, duhsakna leh lawmpuina pawh a dawng hnem hle a ni. 

'I Will Always Love You' singer puala hun hman hi American country music group Little Big Town chuan an host a, Recording Academy MusiCares program atan $mtd 6.7 zet an thawh khawm bawk a ni. 

MusiCares Person of the Year award hi kum 1991 aṭang khan sem ṭan niin, Elton John, Aretha Franklin leh Paul McCartney te pawhin an lo dawng tawh a ni. Kum 2017 khan Tom Petty chuan dawngin, nikum khan Fleetwood Mac kutah hlan a lo ni tawh bawk. 



Share this Post

Login to comment
No Comments