amazon CEO Jeff Bezos leh MacKenzie an inṭhen

Sum leh pai hian thil ti thei viau mah se, a zawng zawngah chuan a lo ṭangkai vek bik lo a ni mahna. amazon CEO Jeff Bezos leh a nupui MacKenzie-te chu kum 25 zet an inneih hnuah an inṭhen ve leh ta. 

Jeff Bezos leh MacKenzie-te hian Nilaini khan an inṭhen thu hi an puang a, mipui a barakhaih hle. Thuchhuah inṭawm an siamah chuan, "Hun rei tak chhung induh leh inhmangaih takin hun kan hmang dun a, tunah chuan inhriatthiam tawnnain kan inṭhen a lo ṭul ta a ni. Nupa hlim ṭhin tak kan ni a, ṭhian ṭha tak kan nih dun zel pawh kan beisei," tiin an tarlang. 

Tun hnai lawk khan amazon chu khawvela company hlu ber a nih thu puan a ni a, an company dintu leh CEO ni bawk Jeff Bezos-a'n nupui a ṭhen thuin a deng zui zat a ni. Kum 54 mi Bezos hi Bloomberg Billionaire Index chuan khawvela hausa berah a puang a, a hausakna hi $tld 137 zet nia chhuat a ni. 

Hetih lai hian a nupui MacKenzie (48) hi novelist a ni a, The Testing of Luther Albright (2005) leh Traps (2013)-te kha a kutchhuak a ni. Bezos nen hian kum 1993 khan an innei a, kum 25 zet duh taka an inpawm hnuah an inṭhen a ni. 

US media-te chuan Bezos hi Fox TV host hlui Lauren Sánchez nen an sawizawm a, hei vanga inṭhen hi an ni em tih chu chiang tak hriat a la ni lo thung. American news anchor Lauren Sánchez hi tun hnaiah Bezos nen hian an inhnim hnai hle niin an sawi a, hei hian an nupa karah khi a siam ta niin an sawi. 

Jeff Bezos leh MacKenzie-te erawh hemi chungchangah hian an la ṭawng chhuak lo a ni. 



Share this Post

Login to comment
No Comments