Forbes India Celebrity 100 List: A zawna kum thum chhung sum lalut hnem ber Salman Khan

Forbes India chuan celebrity zinga sum lalut hnem zual mi 100 a tarlang leh ta a, Bollywood superstar Salman Khan chuan a vawi thum nan pakhatna a hauh leh ta. Kum 52 mi Salamn Khan hian October 1, 2017 - September 30, 2018 chhung khan cheng vaibelchhe 253.25 zet a lalut a, criketer lar Virat Kohli (vbch 228.09) chu pahnihna a ni. 

Salman Khan hi a kum tam ve deuh tawh mah se, sum lakluh kawngah chuan 'tleirawl thaza' ang mai a la ni. Film star zingah top a ni a, infiam mi leh zaithiam te pawhin an tluk chuang lo. Film a channa aṭanga a sum thawhchhuah bakah, fakna leh sponsorship aṭanga kum khat chhunga a sum lakluh hi a namai lo hle. 

Mipa an chungnung

Forbes India Celebrity 100 List-ah hian mipa an langsar hle a, sum lalut hnem zual top 3 te hi mipa vek an ni. Akshay Kumar chuan Salman Khan leh Virat Kohli te hnung zuiin sum lalut tam pathumna a ni a, kum khat chhunga a sum thawhchhuah hi vbch 185 zet a ni. 

Indian criketer zinga hriat hlawh ber te zinga mi Mahendra Singh Dhoni chu sum lalut tam panga-na a ni a, kum khat chhunga a lakluh hi vbch 101.77 a ni. Film star Aamir Khan chuan vbch 97.5 lalutin parukna a hauh a, Amitabh Bachchan chu pasarihna a ni. Kum 72 mi lai ni tawh Bollywood superstar Amitabh Bachchan hian kum khatah vbch 96.17 a lalut hem mai a, a chuai tak tak thei lo. 

Ranveer Singh (vbch 84.67) chu pariatna niin Indian criketer zinga ropui ber ang hiala an sawi ṭhin Sachin Tendulkar chu pakuana-a a ni a, a sum lakluh zat hi vbch 80 niin, field chhungah a inkhel hmuh tur awm tawh lo mah se a larna a la chhawr ṭangkai hle tih a lang. Lemchan thiam Ajay Devgn chu top 10-ah a lang bawk a, vbch 74.5 lai a la lalut thei a ni. 

Deepika a duai lo

Forbes India chuan 2012 aṭang khan celebrity zinga sum lalut hnem zual hi a tichhuak ṭan a, top 5-ah hmeichhia an la lang ngai lo. He record chhuanawm loh tak hi Padmaavat star Deepika Padukone hian a rawn thaichhe ta a, a vawi khat nan top 5-ah a rawn inhlangkai a ni. 

Kum 32 mi Deepika hian kum khat chhungin vbch 112.8 zet a lalut a, sum lalut tam palina a ni. Deepika hi Bollywood bakah Hollywood thlenga lang phak niin, hmeichhe zinga sum lalut hnem ber a ni nghal bawk. 

Forbes India Celebrity 100 List-ah hian AR Rahman, Alia Bhatt, Shah Rukh Khan leh Sanjay Dutt te an langsar viau bawk a, Katrina Kaif chu 21-na a ni phak ṭawk thung. Top 100 te sum lakluh belhkhawm hi vaibelchhe 3,140.25 zet a ni a, kum hmasa aiin 17% zetin a pung a ni. 



Share this Post

Login to comment
No Comments