Billboard Woman of the Year Ariana Grande

American singer Ariana Grande chu Billboard magazine chuan 'Woman of the Year 2018' atan an thlang a, thla leh khian he chawimawina hi hlan a ni ang. 

'No Tears Left to Cry' singer Ariana Grande hian music industry-a a thawh hlawk avangin he chawimawina hi a dawng dawn a ni. Billboard chuan, "Ariana hian music khawvelah hnuhma ṭha tak a hnutchhiah a, a hna thawh te hi a chhuanawm takzet a ni. Tun hnaia a hnathawh ringawt pawh hi chhiar tham fe a ni a, chawimawina hlan hi a phu hle a ni," tiin an tarlang. 

Billboard hian December 6 khian New York khawpuiah hmeichhia te tan bik 'Music Dinner And Award Gala' an buatsaih dawn a, he hunah hian chawimawina hi hlan a ni ang. Kum 25 mi hi kum lama naupang zawkte tan pawha entawn tlak a nih thu an tarlang bawk. 

Hun khirh paltlangin

Ariana Grande tan kumin hi 'kum ṭha' a tih ngawt theih bik loh a, harsatna chi hrang hrang a tawk ve nasa hle. Thla hmasa lawk khawn a bialpa Pete Davidson nen an inṭhen a, hemi hma hian a bialpa hlui Mac Miller chu a thi bawk. 

American rapper Mac Miller hi September thla khan a boral a, Ariana pawh hian a tuar ve hle niin a ngaih teih. Social media lamah pawh Miller sunna thu a tarlang nasa hle a, an thlalak dun pawh eng emaw zat a pholang a ni. 

American comedian Pete Davidson nen an inhual zet hnuah an inṭhen lek bawk a, atan 'kum ṭha' tia chhal ngam harsa tur tak a ni. Heti chung hian a eizawnna a thlah thlam lo a, tun hnai khan a hla thar 'Thank u, next' tih chu a tichhuak a ni. He hla hi Apple Music chart-ah No.1 a ni nghal a, darkar 24 chhung lekin mi maktaduai kua vel zetin an stream bawk. 

Harsatna a tawh te chuan music khawvela a ropuina a dal zo lo a, Billboard Woman of the Year chawimawina chuan a zui dawn ta zawk a ni. 



Share this Post

Login to comment
No Comments