American Music Award sem a ni ta Taylor Swift a ropui ber

Music khawvela chawimawina ngaihlut berte zinga mi American Music Award chu nimin zing khan Microsoft Theater, Los Angeles-ah sem a ni a, Taylor Swift chu Artist of the Year atan thlan a ni.

Taylor Swift-i'n award ngaihlut ber a dawn lai hian Camila Cabello, Post Malone, Migos, Kane Brown, Carrie Underwood, Bruno Mars leh Cardi B te chu an langsar viau bawk. 

Aw ropui ber Tayloar Swift!

46th American Music Award-a langsar ber chu American singer Taylor Swift a ni. Swift hian award pali a hum haw a, hmeichhe zaithiam zinga he chawimawina dawng hnem ber a ni nghal bawk. 

Swift hian American Music Award hi 23 zet a dawng tawh a, Whitney Houston record (21) a khum a ni. Mipa lamah pawh Michel Jackson chiah phak loh a nei a, 'King of Pop' hian ṭum 24 zet a lo dawng tawh a ni. Swift hian Jackson record hi a hnaih hle a, tun anga a kal zel chuan a khum ngei dawn niin a lang. 

'Delicated' singer hian 'I Did Something Bad' tih hla nen Award Ceremony hi a khuhhawng a, a chepui leh rem rem hle. A perform a hmuhnawm tak zet a, mit leh beng a tlai tak zet a ni. 

Award sem a nih hnuah pawh kum 28 mi Taylor Swift bawk a lagsar a, award ngaihlut ber 'Artsist of The Year' a dawng. He award dawng tur hian Drake, Imagine Dragons, Post Malone leh English singer Ed Sheeran te a khum a, dah hniam chi rual a ni lo. 

Award ngaihlut dang 'Favorite Female Artist' chu hlan a ni a, nikum November thla-a a tlangzarh 'Reputation' chu 'Favorite Album' atan thlan a ni bawk. 

'Reputation' album pual hian kumin May thla aṭang khan tour a nei a, a hlawhtling rem rem hle. A hlawhtlinna hi a takin a lang chhuak a, 'Tour of The Year' atan thlan a ni. 

Award dawngtute chu...

Microsoft Theater, Los Angeles-ah milar an fuankhawm a, award dawng pha leh pha lo an kat nuk. American-Cuban singer Camila Cabello chuan award pathum - Collaboration of The Year, Favorite Music Video leh Favorite Song te a dawng a, a langsar hle. 

Cabello hian a hla hit 'Havana' a hlawhtlinpui a, award pathum zet a dawn phah a ni. 

American rapper lar Post Malone chu 'Favorite Male Artist' atan thlan a ni a, Korean Boy Band BTS te chuan 'Favorite Social Artist' award an dawng. BTS hi an perform bawk a, lawm an hlawh leh pek hle a ni. 'Favorite Duo/Group' award chu American hip hop trio, Migos te kutah hlan a ni bawk. 

Country music

Country music lamah Kane Brown leh Carrie Underwood te an langsar a, Florida Georgia Line te chu award dawng zingah an tel ve bawk. 

American country singer Kane Brown chuan award pathum - 'Favorite Male Artist', 'Favotite Album' leh 'Favorite Song' te a dawng a, mimala langsar ber a ni. Carrie Underwood kutah 'Favorite Female Artist' award hlan a ni a, ani hi perform zingah a tel bawk. 

Country music duo, Florida Georgia Line chuan 'Favorite Duo/Group' award an dawng bawk. 

Rap/Hip-Hop

American rapper Cardi B chuan Rap/Hip-Hop huanga award ngaihlut ber a la a, 'Favorite Artist' atan thlan a ni. Cardi hian a hla hit 'Bodak Yellow' hmangin 'Favorite Song' award a dawng bawk a ni. 

Cardi B a lansarh rual hian Post Malone chu rap huangah pawh chawimawina dawng thei zingah a tel a, a album 'Beerbongs & Bentleys' chu 'Favorite Album' atan thlan a ni. 

Soul/R&B

Soul/R&B category-ah award pali sema ni a, Khalid, Rihana, XXXTentacion leh Bruno Mars - Cardi B ten an dawng. Khalid chu 'Favorite Male Artist' atan thlan a ni a, Rihana chuan 'Favorite female Artist' a dawng ve thung. 

Kumin June thla-a boral American rapper XXXTentacion chu a thih hnuah chawimawiin a awm a, a studio album hmasa ber '17' chu 'Favorite Album' atan thlan a ni. Bruno Mars leh Cardi B te chuan an inkawp fuh zar zo leh in, an hla 'Finesse' chu Soul/R&B huanga 'Favorite Song' atan thlan a ni. 

American rock band, Panic! at the Disco chuan Alternative Rock huangah 'Favorite Artist' award an dawng a, Canadian singer  Shawn Mendes chu 'Favorite Artist in Aldult Contemporary' award hlan a ni bawk. 

Latin artist zingah Daddy Yankee bawk a langsar a, 'Favorite Artist' atan thlan a ni. American singer Lauren Daigle chu Contemporary Inspirational huangah 'Favorite Artist' atan thlan a ni bawk. 

Electronic Dance Music hungah American electronic music producer, Marshmellow a langsar a, Kendrick Lamar leh artist hrang hrangte zarah Black Panther chuan 'Favorite Soundtrack' award an dawng bawk a ni. 

Tute nge perform

American Music Award-a perform hi zaithiam te tan chuan chawimawina a tling a, an duhthusam zinga pakhat a ni. Taylor Swift chu dawhsan lawn kai hmasa ber a ni a, 'I Did Something Bad' hla nen hot takin bul a ṭan a ni. 

Cardi B chuan 'I Like It' tih hla a perform a, J Balvin leh Bad Bunny ten an feat a ni. Cardi B hi award ceremony-a perform hmuhnawm ber te zinga mi niin, mipui thawm pawh a ring ṭha hle. Carrie Underwood chuan 'Spinning Bottles' a sa a, a hla leh stage cheibawl dan pawh a inmil hle. 

Award pali zet huitu Camila Cabello perform a hmuhnawm a, 'Consequences' hla a sak laiin mipui an awm hle hle thei lo. English singer Dua Lipa chuan a hla hit 'One Kiss' a thlawh ve bawk. 

Panic! At the Disco te chuan Queen anthem 'Bohemian Rhapsody' an sa a, Post Malone leh Ty Dolla $ign te an chepui hle bawk. Post Malone leh Ty Dolla $ign te hian 'Psycho' an perform a ni. 

Shawn Mendes chuan a hla thar 'Lost In Japan' a thlawh fuh hle a, Mariah Carey leh Jennifer Lopez te an perform ṭha hle bawk. 

Black-ish actress Tracee Ellis Ross chuan a zawna a kum hnih nan award ceremony hi a host a, American hrang hlui zaithiam famta Aretha Franklin sunna hun hman a ni bawk. 

American Music Award Winner Ṭhenkhat :

ARTIST OF THE YEAR : Taylor Swift

NEW ARTIST OF THE YEAR : Camila Cabello

FAVORITE SOCIAL ARTIST : BTS 

FAVORITE MALE ARTIST: Post Malone

FAVORITE DUO OR GROUP (POP/ROCK) : Migos

FAVORITE MALE ARTIST (COUNTRY) : Kane Brown

FAVORITE FEMALE ARTIST (COUNTRY) : Carrie Underwood

FAVORITE ARTIST (RAP/HIP-HOP) : Cardi B

FAVORITE MALE ARTIST (SOUL/R&B) : Khalid

FAVORITE FEMALE ARTIST (SOUL/R&B) : Rihanna

FAVORITE ALBUM (SOUL/R&B) : XXXTentacion, 17

FAVORITE ARTIST (LATIN) : Daddy Yankee

FAVORITE ARTIST (EDM) : Marshmellow

FAVORITE SOUNDTRACK : Black Panther : The Album



Share this Post

Login to comment
No Comments